Azərbaycan, Bakı, 24 oktyabr / Trend , müxbir Ü.İsmayılova/
Dövlət lizinq şirkətinin xətti üzrə 2005-2009-cu illərdə ölkəyə 745 kombayn, 2,28 min traktor, 140 ekskavator, 5,69 min kənd təsərrüfatı texnikası idxal olunub. Bu barədə rəsmi qəzetə müsahibəsində "Aqrolizinq" ASC-nin İdarə Heyətinin sədri Əli Bayramov bildirib.
Bayramovun sözlərinə görə, bu dövr ərzində Aqrolizinq xətti ilə səkkiz süd zavodu tikilib, 19 soyuducu anbar quraşdırılıb, həmçinin səkkiz ədəd yem üçün avadanlıq, 236,9 min ton mineral gübrə, 294,3 min ton pesdisit alınıb.
"Ötən il Aqrolizinq 10 milyon manat həcmində 18,078 min ton superfosfat gübrəsi alıb, sözügedən gübrələr istehsalçılar tərəfindən 70 faiz endirimlə satılıb, - Bayramov bildirib. - İlin sonunadək daha 18 min ton gübrənin alınması planlaşdırılır".
Dövlət şirkəti sədrinin sözlərinə görə, Aqrolizinq ilin sonunadək həmçinin 4,1 milyon manat məbləğində 7,18 min ton taxıl dəni alacaq ki, bu da istehsalçılar tərəfindən 50 faiz güzəştli qiymətə satılacaq.
Şirkətin sərəncamında olan üç milyon manat hesabına Almaniyadan 770 baş mal-qara alınıb. Sözügedən mal-qara 61 fiziki və hüquqi şəxsə üç il müddətinə lizinqə veriləcək.
"Aqrolizinq" ASC 2005-2009-cu illər ərzində 1,96 min şəxsə lizinqə 3,48 min kənd təsərrüfatı avadanlığı verib. Onların 1,08 mini traktor, 69 kombayn, 54 ekskavator və 2,27 mini digər kənd təsərrüfatı avadanlıqlarıdır.
Bu dövr ərzində lizinq şərtləri ilə 61 fermerə 770 baş mal-qara verilib.
Fəaliyyətinin beş ili ərzində ASC texnika istifadəsi və lizinq əməliyyatları, mineral gübrələrin, buynuzlu mal-qaranın, taxın dənlərinin güzəştli satışı nəticəsində 48,79 milyon manat toplayıb.
Onlardan 9,9 milyon manat aqroservis xidmətləri, 13,07 milyon manat lizinq əməliyyatları, 2,31 milyon manat texniki avadanlıqların satışı, 20,6 milyon manat mineral gübrə və pestisidlərin satışı, 2,09 milyon manat taxın dənləri, 0,82 milyon manat isə cins buynuzlu mal-qaranın satışından əldə olunub.
Dövlət büdcəsindən dövlət şirkətinə beş il ərzində 221,26 milyon manat ayırılıb ki, bunun da 25 milyon manatı 2005-ci ilin, 41 milyon manatı 2006-cı ilin, 37,5 milyon manatı 2007-ci ilin, 72,5 milyon manatı 2008-ci ilin, 45,26 milyon manatı isə 2009-cu ilin payına düşüb.
Oktyabrın 24-nə olan rəsmi məzənnə 0,8031 AZN/USD təşkil edir.
Məqalə müəllifi ilə əlaqə ünvanı: [email protected]
