Gürcüstan, Tbilisi, 29 oktyabr / Trend , müxbir N.Kirsxaliya/
Cümə axşamı Tbilisidə "Gürcüstan və Ukrayna sərhədlərində nəqliyyat vasitələrinin və malların keçirilməsi barədə ilkin informasiyaların mübadiləsinin təşkilinə dair" razılaşma imzalanıb.
Gürcüstanın mədaxil üzrə dövlət xidmətinin başçısı Georgi Sxakaya bildirib ki, razılaşma yüklərin idxal və ixracı ilə bağlı informasiyaların mübadiləsini nəzərdə tutur. Onun sözlərinə görə, bu sənəd kargüzarlığın sadələşdirilməsi və risklərin azaldılmasına kömək edəcək.
Azərbaycan və Moldova ilə də bənzər razılığın rəsmiləşdirilməsi üzrə danışıqlar aparılır.
Sənəd GUAM komitəsinin 11-ci iclası çərçivəsində ticarət və nəqliyyata dəstək layihəsi üzrə hazırlanıb.
İclasda Gürcüstan, Ukrayna, Azərbaycan və Moldovanın gömrük və sərhəd idarələrinin rəhbərləri iştirak ediblər. İclasın məqsədi GUAM ölkələri arasında yükdaşımaların həyata keçirilməsinə dəstək və ticarət sahəsində əməkdaşlığın inkişafıdır.
Məqalə müəllifi ilə əlaqə ünvanı: [email protected]
