Azərbaycan, Bakı, 09 noyabr / Trend /
Dünyanın böyük neft-servis şirkətlərindən biri - ABŞ-ın Baker Hughes şirkəti BP ilə maili qazıntının həyata keçirilməsi, təbəqələrin qiymətləndirilməsi və Azərbaycanda layihələr çərçivəsində quyuların doldurulmasıüzrə müqavilə imzalayıb. Bu barədə Baker Hughes-un məlumatında deyilir.
Müqavilənin dəyəri 300 milyon dollar təşkil edir. Baker Hughes onun həyata keçirilməsinə 2010-cu ildə başlayacaq.
Baker Hughes şirkəti neft-qaz müəssisələrinə qazma və quyuların doldurulması üzrə xidmətlər, həmçinin məhsuldar təbəqələrin paralmetrlərinin və dünyanın 90-dan çox ölkəsində karbohidrogen xammalı hasilatının qiymətləndirilməsi üzrə xidmətlər təqdim edir.
BP şirkəti Xəzərin Azərbaycan hissəsində "Azəri-Çıraq-Günəşli" yataqlar blokunun işlənməsi üzrə layihənin operatorudur. Hazırda bu yataqlardan hasilatın ümumi həcmi sutkada təxminən 900 min barel təşkil edir. Yataqlarda hasilatın həyata keçirilməsi üçün altı platforma qurulub, onun dördü hasilat platformasıdır. Yaxın illərdə bu yataqlarda daha iki qazma platformasının quraşdırılması nəzərdə tutulur.
"Azəri-Çıraq-Günəşli" yataqlar blokunun işlənmə layihəsinin səhmdarları: BP (operator - 34,1%), Chevron (10,2%), ARDNŞ (10%), INPEX (10%), StatoilHydro (8,6%), ExxonMobil (8%), TPAO (6,8%), Devon (5,6%), ITOCHU (3,9%), Hess (2,7%). Lazımı kapital yatırımlarının həcmi 20 milyard dollar təşkil edir.