Azərbaycan, Bakı, 16 fevral / Trend , müxbir N.İsmayılova/
Bank Melli İran bankının Bakı filialı lokal plastik kartların emissiyasını genişləndirir. Bu barədə bank filialının direktor müavini Anar İbrahimov çərşənbə axşamı bildirib.
"Bank ötən ilin oktyabr ayında plastik kartların tamqiymətli emissiyasına başlayıb. Hazırda kredit, debet və əməkhaqqı kartlarının verilməsinə başlanılıb", - İbrahimov deyib.
Onun sözlərinə görə, bank məhsul yeniliyini nəzərə alaraq, plastik kartların emissiya həcmini kəskin artırmaq niyyətində deyil, hazırda 50-dən artıq lokal kart emitasiya edilib.
Bank kartların emissiyasını 3 mərhələdə genişləndirəcək. Birinci, bank əməkdaşlarının kartla təmin edilməsi, ikinci, İranın Azərbaycandakı müəssisə və hökumət nümayəndəliyi işçilərinin kartla təmin edilməsi, üçüncü, kartların ticari və digər maraqlanan şəxslərə təqdim edilməsi.
Bank Melli İran Azərbaycanda öz bankomatlarının və POS-terminallarının qurulmasına başlayıb.
Bank İran Milli Bankının filialı olduğundan onun fəaliyyəti hansısa səviyyədə məhdudlaşıb. Buna görə də bank müştərilərə Visa və MasterCard beynəlxalq ödəmə sistemlərinin dəstəklədiyi plastik kartları təqdim edə bilmir. Bankın məqsədi lokal kartla xidmət göstərməkdir.
