Azərbaycan, Bakı, 18 fevral / Trend , müxbir E.İsmayılov/
Bakı Metropoliteni "Bakı Metropoliteninin 20 illik inkişafı üzrə Dövlət Proqramı"nın 4 variantını müvafiq dövlət strukturlarının baxışına və razılığına göndərib. Bunu cümə axşamı Bakı Metropoliteninin rəhbəri Tağı Əhmədov deyib.
"İşlər aparılır. Artıq hər şey razılığa göndərilib", - Əhmədov deyib.
Onun sözlərinə görə, sənədin variantları Nazirlər Kabinetinə, Bakı şəhər İcra Hakimiyyətinə, Arxitektura və Şəhərsalma üzrə Dövlət Komitəsinə, Maliyyə, İqtisadi İnkişaf və Nəqliyyat nazirliklərinə göndərilib. Bu strukturlar sənədə baxaraq may ayınadək öz təkliflərini verəcəklər.
Layihə xarici şirkətlər konsorsiumu tərəfindən hazırlanır. Xarici şirkətlər konsorsiumuna Fransanın SYSTRA SA, Çexiyanın MOTT McDonalds və Cənubi Koreyanın SAMAN şirkəti daxildir. Bu konsorsiumda aparıcı rol Fransa şirkətinə məxsusdur.
20 illik inkişaf proqramı çərçivəsində 2040-cı ilədək 46 yeni stansiyanın tikilməsi və istismara verilməsi nəzərdə tutulur.
"Metropolitenin inkişaf proqramı" çərçivəsində paytaxtda sərnişin axınını əks etdirən şəhərin nəqliyyat modeli hazırlanıb. Şəhərdə səhiyyə və təhsil obyektlərinin yerləşməsinin öyrənilməsi məqsədilə Səhiyyə və Təhsil nazirlikləri ilə də işlər aparılır.
Yeni proqramın hazırlanmasına başlamaq üçün Azərbaycan Prezidenti İlham Əliyevin "Bakı Metropoliteninin perspektivli inkişafi ilə bağlı bəzi tədbirlər haqqında" sərəncamına əsasən, Prezidentin Ehtiyat Fondundan 2 milyon manat ayrılıb.
Bakı metropoliteni 1967-ci ildən fəaliyyət göstərir və 22 stansiyaya malikdir.
