Azərbaycan, Bakı, 29 mart / Trend , müxbir İ.Xəlilova/
Dünya maliyyə böhranının Azərbaycanın bank sisteminə təsiri əvvəlki illərlə müqayisədə sektorun əsas göstəriciləri üzrə artım tempinin stabilləşməsində özünü göstərib. Bu barədə Azərbaycan Mərkəzi Bankının 2009-cu ilin yekunları üzrə maliyyə sabitliyinə dair hesabatında bildirilir.
İl ərzində bankın aktivləri 13,5 faiz artaraq (1,4 milyard manat) 11,7 milyard manata çatıb. Birinci rübdə bankların aktivlərinin dinamikasında müşahidə edilən tendensiya (xarici borcun qaytarılması ilə əlaqədar) ikinci rübdən müsbət trendlə dəyişib.
2009-cu ilin əvvəli ilə müqayisədə bank kreditləri 17,3 faiz (1 214 milyon manat) artaraq 2010-cu il yanvarın 1-nə 8 230,4 milyon manat təşkil edib. Hüquqi şəxslərə verilən kreditlərin həcmi il ərzində 25,7 faiz artaraq 5,8 milyard manata çatıb. Ev təsərrüfatı üçün verilən kreditlər ilin sonunda 2171,6 milyon manat təşkil edib.
Fiziki şəxslərin kredit borcunun azalması (-0,3 faiz) və əmanətlərin artması (22,5 faiz) nəticəsində kreditlərin əmanətlərə nisbəti 122,6 faizdən 99,7 faizə enib. Bu vəziyyət ev təsərrüfatları üçün təkrar maliyyələşdirmə risklərinin azalmasını xarakterizə edir. 2009-cu ilin sonunda sahibkarlıq fəaliyyəti və istehlak kreditləri üçün kreditlərin xüsusi çəkisi ümumi kredit portfelində müvafiq olaraq 9 faiz və 75 faiz təşkil edib. Daşınmaz əmlakla bağlı kreditlərin payına kredit portfelinin 11 faizi düşür.
2009-cu il ərzində bankların filial şəbəkəsi 567-dən 626-dək, bank şöbələri isə 99-dan 109-dək artıb. 301 filial (48,1 faiz) ölkə regionlarında yerləşir.
Martın 29-na olan rəsmi məzənnə 0,8033 AZN/USD təşkil edir.