Azərbaycan, Bakı, 31 mart / Trend , müxbir Ü.İsmayılova/
"Atəşgah Sığorta" ASC-nin 2009-cu ildəki fəaliyyətinin yekunları üzrə aktivləri 18,64 milyon manat təşkil edərək il ərzində 6,67 faiz artıb. Bu barədə müstəqil auditorun rəsmi mətbuatda dərc olunmuş rəyində bildirilir.
Həmin dövrdə şirkətin uzunmüddətli aktivləri 4,63 milyon manat, qısamüddətli aktivləri isə 14, 01 milyon manat təşkil edib. Şirkətin depozit hesablarında qısamüddətli aktivlərin strukturunda 5,44 milyon manat cəmləşib və valyuta hesabları 43,26 min manat təşkil edib.
"Atəşgah Sığorta" ASC-nin ödənilmiş nizamnamə kapitalı ötən il 2,7 milyon manat təşkil edib. Ötən ilin yekunları üzrə şirkətin mənfəəti (1,01 milyon manat səviyyəsində) və əvvəlki illərin paylanmamış mənfəəti (1,01 milyon manat) nəzərə alınmaqla, şirkətin məcmu kapitalı ilin yekunları üzrə 6,74 milyon manat təşkil edib. İlin əvvəlində bu göstərici 6,5 milyon manat olub.
Şirkətin uzunmüddətli öhdəlikləri 11,78 milyon manat, qısamüddətli öhdəlikləri 1222,36 min manat, ümumilikdə, kapitalı və öhdəlikləri 18,64 milyon manat təşkil edib.
Ötən ilin yekunları üzrə şirkətin gəlirləri 14,35 milyon manat, o cümlədən sığorta haqlarından daxilolmalar 12,89 milyon manat, təkrar sığorta haqları 182,35 min manat, sığorta ödənişlərində təkrar sığortaçıların payı 422,36 min manat, təkrar sığorta müqavilələri üzrə komisyon haqları 233,64 min manat təşkil edib. Şirkətin investisiya gəlirləri 593,81 min manat səviyyəsində olub.
2009-cu ilin yekunları üzrə şirkətin xərcləri 13,35 milyon manat, o cümlədən sığorta ödənişləri və sığorta məbləğləri ilə bağlı əməliyyat xərcləri 4,19 milyon manat, sığorta haqlarının qaytarılması ilə bağlı 999,04 min manat, sığorta haqlarının təkrar sığortaya verilməsi üzrə 3,9 milyon manat, inzibati xərclər 3,67 milyon manat təşkil edib.
Şirkətin maliyyə mənfəəti ötən il 1,01 milyon manat, nizamnamə kapitalına yönəldilmiş mənfəətinin payı 999 min manat təşkil edib.
Atəşgah Sığorta şirkəti 1996-cı ildə yaradılıb. Şirkətin təsisçiləri I.S.R. Holding Ltd, ARDNŞ və RAN-Eksim şirkətidir.
Martın 31-nə olan rəsmi məzənnə 0,8034 AZN/USD təşkil edir.
