Azərbaycan, Bakı, 17 iyun /Trend, müxbir N.İsmayılova/
Azərbaycan İqtisadi İnkişaf Nazirliyi yanında Sahibkarlığa Kömək Milli Fondu (SKMF) cari ilin payızında iribuynuzlu sağmal qaramal üçün üç heyvandarlıq kompleksinin və iki kiçik və orta qabaritli üzüm istehsalı müəssisəsinin yaradılması üzrə layihələrin həyata keçirilməsinin başa çatacağını gözləyir. Bu barədə fondun icraçı direktoru Şirzad Abdullayev məlumat verib.
"Biz nəzərdə tutmuşuq ki, heyvandarlıq komplekslərinin yaradılması layihəsi cari ilin oktyabr-noyabr aylarında tam şəkildə başa çatdırılacaq, "Aqrolizinq" ASC-nin xətti ilə gətirilən 600 baş qaramal fermalarda yerləşdiriləcək, - Abdullayev deyib. - Payız həm də üzüm yığımı dövrü olduğundan üzüm emalı müəssisələrinin də bu dövrdə fəaliyyətə başlayacağı ehtimal olunur".
Onun sözlərinə görə, bu layihələr nəzarət mexanizmi ilə əlaqədar mərhələli şəkildə maliyyələşdiriləcək. Beləliklə, bu günədək güzəştli maliyyələşdirmənin ümumi məbləğindən 25-30 faiz avans kreditlər kimi sahibkarlara verilib.
SKMF-in iribuynuzlu sağmal qaramal üçün heyvandarlıq komplekslərinin yaradılması üzrə keçirdiyi tenderin qalibi "Hacıcamalxan" aqrar-fermer təsərrüfatı, "Atropatena" süd istehsalı zavodu və "Qarainək" MMC (kəndli-fermer təsərrüfatı) olub. Bu üç layihənin ümumi dəyəri 33 milyon manat təşkil edib. Bu məbləğin 9,7 milyon manatı SKMF-in güzəştli kreditləri hesabına ödəniləcək.
İki kiçik və orta qabaritli üzüm istehsalı müəssisəsinin yaradılması üzrə tenderin qalibləri "Göycay Konyak" ASC və "Sultan-О" MMC olub. Layihələrin hər birinin dəyəri 3 milyon manatdır. Onların iki milyon manatı SKMF-in kreditləri hesabına ödəniləcək.