Azərbaycan, Bakı, 21 iyun /Trend, müxbir N.İsmayılova/
Azərbaycan bazarında tərəfdaşların tapılması məqsədilə Bakıya italiyalı iş adamlarından ibarət nümayəndə heyəti səfərə gəlib. Səfər iyunun 21-dən 22-dək davam edəcək. Bu barədə Trend-ə bazar ertəsi İtaliya şəhəri Paduya Ticarət Palatası yanında xüsusi agentliyin icraçı direktoru Franko Konzato bildirib.
"Bu, Bakıya ilk səfərimizdir və biz Azərbaycanın dinamik inkişaf etməsini və iqtisadiyyatın diversifikasiyasına kifayət qədər diqqət yetirməsi faktını əməkdaşlıq üçün vacib amil hesab edirik", - Konzato deyib.
Onun sözlərinə görə, nümayəndə heyətinin tərkibinə mebel, tikinti avadanlığı, təbii daşlar istehsalı, çörəkbişirmə avadanlığı və PR-idarəçiliklə məşğul olan səkkiz şirkətin nümayəndəsi daxildir.
"Bütün şirkətlər kiçik biznesin nümayəndələridir və onların səfər etməkdə məqsədi müştərilərin tapılması deyil, gələcəkdə birgə müəssisələrin yaradılması daxil olmaqla, tərəfdaşların tapılmasıdır", - o qeyd edib.
Onun sözlərinə görə, danışıqlar uğurla nəticələnərsə, Bakıda İtaliya şirkətlərinin nümayəndəliklərinin açılması istisna edilmir və bunun nəticəsində Azərbaycanın tərəfdaş şirkətlərinin Avropa bazarlarına çıxarılmasında kömək göstərilməsi nəzərdə tutulur.
"Bizim üçün Bakı Xəzər dənizi regionuna körpüdür və biz əminik ki, səfərimiz iki ölkə arasında ikitərəfli münasibətlərin inkişafına və birgə müəssisələrin açılmasına təkan olacaq", - o vurğulayıb.
Paduya nümayəndə heyətinin səfəri, İtaliyanın iqtisadi inkişaf naziri Adolf Ursonun başçılıq etdiyi iqtisadi missiyanın cari ilin aprelində ölkəyə baş çəkməsinin nəticəsi olub.
Səfər İtaliya Ticarət Komissiyası və Azərbaycan İqtisadi İnkişaf Nazirliyinin dəstəyi ilə təşkil olunub.