Azərbaycan, Bakı, 22 iyun /Trend, müxbir Ü.İsmayılova/
"Embawood" MMC (Azərbaycanda iri mebel istehsalçısı) "Masallı-Konserv" ASC-nin (tərəvəz və meyvə emalı, spirtsiz içkilərin və konservlərin istehsalı) səhmlərinin 30 faizinə sahib olub. Bu barədə Azərbaycanın Əmlak Məsələləri Dövlət Komitəsinin çərşənbə axşamı yaydığı məlumatda deyilir.
Səhmlərə sahib olmaq üçün investisiya təklifləri üzrə müsabiqə iyunun 16-18-də keçirilib.
"Müsabiqənin şərtlərinə görə, qalib dövlət büdcəsinə 70 min manat keçirməlidir və bir il ərzində müəssisəyə 500 min manat dəyərində sərmayə yatırmalıdır", - məlumatda qeyd olunub.
Yatırılan sərmayələr müxtəlif növ avadanlığın alınmasına və quraşdırılmasına, daxili və ətraf yolların yenidən qurulmasına xərclənəcək. Bundan başqa, digər tədbirlər də həyata keçiriləcək ki, bunun nəticəsində yumşaq mebel istehsal olunacaq. Müsabiqənin investisiya şərtlərində nəzərdə tutulan görüləcək tədbirlər sayəsində 55-60 yeni iş yerinin açılması təmin olunacaq.
Bu işlərdən başqa, ətraf mühitin qorunması proqramı çərçivəsində ASC ərazilərdə 2000 müxtəlif növ meyvə ağaclarının əkilməsini də öz üzərinə götürüb.
"Embawood" şirkəti 1996-cı ildə Azərbaycanda yaradılıb. Şirkətin Gürcüstan (Tbilisi), Rusiya (Moskva) və Qazaxıstanda (Alma-Ata) rəsmi nümayəndəlikləri fəaliyyət göstərir.
