Azərbaycan, Bakı, 2 iyul /Trend, müxbir N.İsmayılova/
Latviya bankı Parex banka Azərbaycanın 2005-ci ildən fəaliyyət göstərən Parex Leasing & Factoring lizinq şirkətini satmaq niyyətini elan edib. Bu barədə cümə günü Bakıda Parex banka-nın kapitalının idarə edilməsi üzrə direktorluğun rəhbəri və baş vitse-prezident Robert İdelson bildirib. Parex Leasing & Factoring-in nizamnamə kapitalı 50 min dollardır.
"Biz işlək biznesi satdığımıza görə bunun gələcəkdə də davam etməsi bizim üçün vacibdir və biz danışıqları yalnız ciddi alıcılarla aparırıq", - o deyib.
Onun sözlərinə görə, hazırda bank Rusiya və Ukraynada oxşar aktivlərdən azad olunub, Belarusdakı lizinq şirkəti isə artıq satılıb.
Lizinq şirkətinin satılması Latviya bankının aktivlərinin bölüşdürülməsi ilə bağlıdır və nəticədə iki bank Parex banka və yeni Citadele banka yaradılacaq. "Citadele banka" SC Parex banka-nın yenidən qurulması planı çərçivəsində yaradılan kredit təşkilatıdır və onun təsisçisi "Privatizācijas aģentūra" Dövlət Səhmdar Cəmiyyətidir.
Avropa Yenidənqurma və İnkişaf Bankı (AYİB) Parex banka-nın yenidən qurulması prosesində yaradılan Citadele banka-nın səhmlərinin 25 faizinə sahib olacaq. Hökumət Özəlləşdirmə Agentliyinə yeni kredit təşkilatının yaradılması barədə tapşırıq verib. Yeni təşkilatda 100 faiz dövlətə məxsus olacaq. İyunun 21-də hökumət bu təşkilatın 25 faiz səhmlərinin AYİB-ə məxsus olması barədə qərar qəbul edib.
Dövlətin banka yatırdığı vəsaitlərin bir hissəsi (692 milyon lat) köhnə Parex bankа-da qalacaq, 230 milyon lat isə yeni banka keçəcək.
Hazırkı Parex bankа-nın səhmlərinin 76,6 faizinin sahibi dövlət, qalan 19,7 faizinin sahibi isə AYİB-dir.
