Azərbaycan, Bakı, 12 iyul /Trend, müxbir İ.Xəlilova/
Bazar ertəsi Bakıya birgünlük səfərlə Asiya İnkişaf Bankının (AİB) nəqliyyat şöbəsinin direktoru Honq Vanq Azərbaycan hökuməti ilə Masallı-Astara avtomobil magistralının yenidən qurulması layihəsinin davam etdirilməsi ilə bağlı müzakirələr aparmaq məqsədilə gəlir. Bu barədə bankın Bakı nümayəndəliyindən bildiriblər.
"Direktor iyulun 8-dən Bakıda olan nəqliyyat sektoru üzrə baş mütəxəssis Donq-Su Pyonun başçılıq etdiyi bankın missiyasına qoşulacaq. O, layihənin həyata keçirilməsinə başlamaq üçün işlərin gedişi ilə yerində tanış olur", - nümayəndəlikdən bildiriblər və əlavə ediblər ki, şöbə direktorunun səfəri bu yol layihəsinin həyata keçirilməsinin bank üçün əhəmiyyət daşıdığını təsdiqləyir.
Masallı-Astara yol sahəsi Asiya İnkişaf Bankının (AİB) 200 milyon dollar dəyərində krediti və Azərbaycan hökumətinin 49 milyon dollarlıq iştirak payı hesabına çəkiləcək.
Əsas problem, kredit razılaşmasına əsasən, AİB-in iyunun 30-da kreditlərindən isrifadə müddətinin başa çatması ilə bağlıdır. Bank missiyasının səfəri zamanı kreditin qüvvədə olam müddətinin uzadılmasının zəruriliyinin müzakirəsi də planlaşdırılıb. Bankın krediti indiyədək demək olar ki, istifadə olunmamış qalıb, bu müddətin uzadılması üçün hökumət AİB-ə müraciət etməlidir. Bu, bankın Azərbaycanla əməkdaşlığında ilk belə haldır.
Layihəyə başlamaq üçün başlıca məsələlərdən biri Masallı-Astara avtomagistralı yaxınlığında torpaq alınması planının həyata keçirilməsidir. Kredit razılaşmasının şərtlərinə əsasən, torpaq alışı ilə bağlı məsələ 2010-cu ilin iyununadək həll edilməli idi.
Ölkənin Nəqliyyat Nazirliyində hesab edirlər ki, torpaq sahələrinin alınması prosesi hazırda başaçatma mərhələsindədir və tikinti işlərinə 2010-cu ilin oktyabrında başlanılması planlaşdırılıb.
Nazirlikdən qeyd etdiklərinə görə, yolun tikintisinin podratçısı hələ müəyyənləşməyib, belə ki, tenderin nəticələri torpaq ərazilərinin alınması ilə bağlı son qərar verildikdən sonra elan edilə bilər.
Masallı-Astara avtomagistralı üç əraziyə bölünüb. Hazırda avtomagistralın birinci ərazisinin (uzunluğu 21 km) tikintisi üzrə podratçı müəyyənləşir.
Layihə AİB-in Direktorlar Şurasında 2007-ci il sentyabrın 28-də təsdiqlənib, bankla kreditin verilməsi sazişi isə 2009-cu il yanvarın 15-də imzalanıb. Asiya bankının kredit resursları bankın adi resurslarından hissə-hissə (190 milyon dollar) 24 il müddətinə dörd illik güzəştlə və ildə libor+0,6 faizlə verilib. 10 milyon dollar güzəştli kredit isə 32 il müddətinə səkkiz illik güzəştli dövrlə və güzəştli dövr ərzində bir faizlə, qalan dövrlər üzrə 1,5 faizlə verilib. Kreditin güzəştli hissəsi avtomagistrala birləşən ikinci dərəcəli kənd yollarının yenidən qurulmasına hesablanıb.
Masallı-Astara avtomobil yolununun yenidən qurulmasına kredit Multitranche Financing Facility (MFF) mexanizmi çərçivəsində 500 milyon dollar məbləğində təqdim edilib və üç yol layihəsinin maliyyələşdirilməsinə hesablanıb. Bu günədək iki layihə razılaşdırılıb, AİB MFF çərçivəsində qalan vəsaitlərdən istifadəyə isə 2014-cü ilədək vaxt ayırıb.
