Azərbaycan, Bakı, 4 avqust /Trend, müxbir S.Süleymanov/
Qazaxıstan cari ilin altı ayı ərzində İrana 591 min ton taxıl tədarük edib. Bu barədə Trend-ə çərşənbə günü Qazaxıstan Kənd Təsərrüfatı Nazirliyindən məlumat veriblər.
"İlin birinci yarısında Qazaxıstan taxılının İrana tədarük edilən həcmi 591 min ton təşkil edib. Ötən il ümumilikdə tədarükün həcmi 988 min ton səviyyəsində olub", - nazirliyinin mətbuat xidmətindən bildiriblər.
Qazaxıstan Prezidenti Nursultan Nazarbayevin çərşənbə axşamı Ak-Ordada keçirilən iclasda dediyinə görə, respublikanın 2010-2011-ci marketinq illərində ixrac potensialı 8 milyon ton təşkil edir.
Bununla yanaşı, Trend-ə "Prodkorporasiya" milli taxıl şirkətindən bildirdiklərinə görə, İranda olduğu kimi, Azərbaycanda da gətirilən taxıla 100 dollar məbləğində yüksək gömrük rüsumu tətbiq edilib.
"Lakin biz ümid edirik ki, həm Azərbaycanda, həm də İranda yaxın vaxtlarda bu rüsumlar ləğv ediləcək, belə ki, dünya bazarlarında taxılın qiyməti artmaqdadır. Rüsumun olması isə un və çörəyin qiymətinə təsir göstərir", - şirkətdəki məlumatlı mənbə deyib.
Onun dediyinə görə, hazırda təkcə bir ay arzində taxılın qiyməti 100 dollar artıb. Belə ki, ABŞ-da bu göstərici bir ton üçün 261 dollar, Fransada 268 dollar, Argentinada 245 dollar, Kanadada 314 dollar, Rusiyada isə 240 dollar təşkil edib.