Azərbaycan, Bakı, 5 avqust /Trend, müxbir N.İsmayılova/
İlk dəfə olaraq yeni səhmdar - Avropa Yenidənqurma və İnkişaf Bankının iştirakı ilə keçiriləcək Azərbaycanın prosessinq mərkəzi "Milli Kart" MMC-nin Direktorlar Şurasının növbəti illik yığıncağı avqusta planlaşdırılıb. Bu barədə cümə axşamı "Milli Kart"ın icraçı direktoru Cəlal Orucov bildirib.
"İclasda Direktorlar Şurası sədrinin rotasiyası keçiriləcək. Hazırda Direktorlar Şurasının sədri "Unibank"dır", - Orucov bildirib.
O, AYİB-in belə hüquq əldə edə biləcəyini [Direktorlar Şurasına rəhbərlik etmək] istisna etməyib.
Onun sözlərinə görə, AYİB "Milli Kart"ın fəaliyyətini yoxlayan, mərkəzin texniki prosedurunun yaxşılaşdırılması və korporativ idarəetmə üzrə hesabat hazırlayan konsaltinq şirkətini cəlb edib.
"Bu hesabat Direktorlar Şurasına prosessinq mərkəzinin fəaliyyətinin təkmilləşdirilməsi məqsədilə təqdim ediləcək", - o qeyd edib.
Hazırda "Milli Kart"a 10 Azərbaycan bankı qoşulub və mərkəz tərəfindən 170 mindən çox plastik kart buraxılıb.
AYİB mərkəzin kapitalında iştirak payı almaqla yanaşı, prosessinq mərkəzinə 250 min dollar məbləğində texniki yardım da göstərib.
MMC 2006-cı il iyulun 14-də ölkənin 18 bankı tərəfindən Azərbaycan Mərkəzi Bankının kart ödənişləri üzrə Prosessinq Mərkəzinin alınmasından sonra yaradılıb. Hazırda mərkəzin kapitalında bankların iştirakının minimum həcmi bir faiz, maksimum 10 faiz təşkil edir. Mərkəzin nizamnamə kapitalı 5 milyon manatdır.
Mərkəzin təsisçiləri bunlardır: Atabank, DəmirBank, AzerTurkBank, Bank of Baku, Azərbaycan Sənaye Bankı, Debutbank, Amrahbank, Xalq Bank, Credo Bank, AccessBank, Parabank, RabitəBank, Bank Respublika, Bank Standard, Texnikabank, TuranBank, Unibank, ZaminBank və AYİB.
Avqustun 5-nə rəsmi məzənnə 0,8034 AZN/USD təşkil edir.