Azərbaycan, Bakı, 13 avqust /Trend, müxbir E.İsmayılov/
Yanvar-iyun aylarında Bakı Beynəlxalq Dəniz Ticarət limanı 478 min ton quru və konteyner yükləri daşıyıb ki, ötən ilin analoji dövründə bu göstərici 420 min ton olub.Bu barədə Bakı limanından mənbə cümə günü deyib.
Quru yüklərin əsas hissəsini İrandan idxal olunan sement klinkerləri təşkil edir. Eləcə də, mənbənin sözlərinə görə, yanvar-iyun aylarında 5920 konteyner daşınıb. Konteyner yüklərinin əsas hissəsini Avropadan Qazaxıstan (Aktau) istiqamətində daşınan humanitar yüklər təşkil edib.
Quru yüklər kimi konteyner yüklərinin daşınmasında da artım müşahidə olunub.
Qara dəniz, Gürcüstan və Azərbaycan ərazisindən humanitar yüklərin daşınmasına ötən ilin martından başlanılıb. Onların daşınması TRACECA nəqliyyat dəhlizi çərçivəsində Əfqanıstan istiqamətində həyata keçirilir. Humanitar yüklər tibb preparatlarından, tikinti materiallarından və qida məhsullarından ibarətdir.
Mənbənin sözlərinə görə, bu ilin yanvar-iyun aylarında liman vasitəsilə 1,5 milyon tona yaxın bərə yükü (vaqonların yüklənməsi) daşınıb ki, ötən ilin yanvar-iyununda bu göstərici 1,3 milyon tona yaxın təşkil edib.
Mənbənin sözlərinə görə, ümumilikdə, 2009-cu ildə liman vasitəsilə 5,1 milyon tona yaxın yük daşınıb ki, bu da 2008-ci ilin göstəricisindən 10% aşağıdır.
Keçən ilin yekunlarına görə, 10%-lik artım bərə yüklərinin daşınmasında müşahidə edilib, daşınmaların həcmi 2,3 milyon ton təşkil edib. Həmçinin, 2008-ci ilə nisbətən keçən il liman üzərindən quru yük daşımaları 2 dəfə artaraq 300 min tona çatıb.
Mənbə daha əvvəllər deyib ki, 2008-ci ildə Bakı limanından 6 milyon tona yaxın müxtəlif yüklər daşınıb. Keçən il göndərilən yüklərin həcminin 3 milyona yaxını neft və neft məhsullarının, qalan 3 milyonu isə bərə nəqliyyatı ilə hərəkət edən yüklərin payına düşüb (Bakı-Türkmənbaşı, Türkmənbaşı-Bakı, Bakı-Aktau, Aktau-Bakı).
