Аzərbaycan, Bakı, 25 avqust /Trend, müxbir А. Axundov/
Azərbaycanın sığorta şirkəti "Ateshgah" əmlak və həmçinin, uşaqların bədbəxt hadisələrdən sığortalanması ilə bağlı yeni məhsullar təqdim edəcək. Bu barədə Trend-ə şirkətin idarə heyətinin sədri Azər Əliyev deyib.
"Bizdə həmişə yeni məhsulların hazırlanması üzrə işlər gedir.Yaxın günlərdə ictimaiyyətə yeni məhsul çeşidlərini təqdim edəcəyik. Bu, daşınar və daşınmaz əmlakın və həmçinin, uşaqların bədbəxt hadisələrdən sığortalanmasına istiqamətlənmiş məhsullardır", - o bildirib.
İlin sonuna qədər "Ateshgah" sığorta rüsumlarının həcmini 14 milyon manata çatdırmağı planlaşdırır.
Əliyevin sözlərinə görə, yaxın günlərdə ölkənin regionlarında dörd nümayəndəliyin açılması planlaşdırılır.
"Artıq ölkənin regionlarında 6 nümayəndəlik və Bakıda 4 filial açılıb. Daha dörd nümayəndəlik açmağı planlaşdırırıq", - Əliyev deyib.
Onun sözlərinə görə, bankın avtokreditləşdirməni bərpa etməsi şirkətin avtomobil sığortası üzrə portfelinin artmasına müsbət təsir göstərib.
"Ateshgah" şirkəti 1996-cı ildə yaradılıb. Bankın nizamnamə kapitalı 2,7 milyon manat təşkil edir. Şirkətin səhmdarları "I.S.R. Holding Ltd", ARDNŞ və "RAN-Eksim" şirkətidir.
Avqustun 25-nə rəsmi məzənnə 0,8039 AZN/USD təşkil edir.
