Azərbaycan, Bakı, 31 avqust /Trend, müxbir N.İsmayılova/
Azərbaycan Mərkəzi Bankı (AMB) ölkənin bank sektoruna likvidlik köməyinin göstərilməsinə ehtiyac görmür. Bu barədə çərşənbə axşamı AMB-nin baş direktoru Xaqani Abdullayev deyib.
"İndi ölkə iqtisadiyyatına qoyulan ümumi kredit əmanətlərinin artımı 5 faiz səviyyəsində müşahidə edilir. AMB, dünya maliyyə böhranını nəzərə alaraq, bank sektoruna menecment risqi sistemi üzrə tələbləri gücləndirib və bu tələblərə əsasən, banklar öz kredit siyasətlərində bütün mümkün riskləri əhatə etməlidirlər", - Abdullayev vurğulayıb.
Onun sözlərinə görə, bankların resurs bazası, yəni cəlb edilən depozit bazası hazırda 16 faiz artım tempinə malikdir. Azərbaycan banklarında depozitlərin həcm artımı kreditlərin artımını üç dəfədən çox ötür. Ümumi kreditlərin həcmində müddəti uzadılmış kreditlərin xüsusi çəkisi beş faizdən çox deyil.
"AMB kredit portfelinin keyfiyyəti və ölkənin real sektorundakı vəziyyət arasında əlaqələrin təhlili məqsədilə monitorinq aparır. Biz bütün banklara stres-testlərin modellərini təqdim etmişik. Banklar onlar vasitəsilə kredit portfelinin keyfiyyətinə mümkün daxili və xarici faktorların təsir edə bilməsini göstərən simulyasiyanı keçirə bilər ki, buna da yaxın aylarda kredit portfelinin keyfiyyətinin nəzərəçarpacaq dərəcədə dəyişməsi üçün əsas yoxdur", - o deyib.
Onun sözlərinə görə, bugünədək ölkəyə cəlb edilən xarici borcların həcmi əvvəllər cəlb edilən vəsaitlər üzrə ödənişləri, təxminən, iki dəfə ötür və odur ki, AMB tərəfindən likvidliyə dəstəyin göstərilməsinə ehtiyac yoxdur və indi likvidliyin qayıdışının əks-prosesi baş verir.
