Azərbaycan, Bakı, 18 oktyabr /Trend, müxbir E.İsmayılov/
Oktyabrın 12-də Brüsseldə (Belçika) keçirilən TRACECA (Avropa-Qafqaz-Asiya) nəqliyyat dəhlizinin investisiya forumunda təqdim olunan Ələt limanında Beynəlxalq Logistika Mərkəzinin yaradılması layihəsi avropalı sərmayədarların böyük diqqətini cəlb edib. Bu barədə bazar ertəsi TRACECA-nın Azərbaycan üzrə milli katibi Akif Mustafayev məlumat verib. Ələt qəsəbəsində yeni limanın tikintisi bu ilin sonunadək başlayacaq.
Mustafayevin sözlərinə görə, investisiya forumu çərçivəsində Azərbaycanın təqdim etdiyi layihə hesablamalar və təqdimatlarla əsaslandırılıb. Ona görə də avropalı sərmayədarların, o cümlədən, Almaniya, İtaliya şirkətlərinin, həmçinin, Avropa İnvestisiya Bankının və digər struktuturların diqqətini cəlb edib.
Sərmayədarlar yeni limanda təşkil olunması planlaşdırılan logistika mərkəzinin yaradılması layihəsinin maliyyələşdirilməsi üçün müvafiq dövlət strukturları ilə danışıqlara hazır olduqlarını bəyan ediblər. Lakin Mustafayevin sözlərinə görə, maliyyələşdirmə məsələləri üzrə lazımi görüşlərin və danışıqların aparılması üçün yeni limanın tikintisi üzrə işlərin başlanması vacibdir. Yeni limanın tikintisinə başlanacağı vaxtdan asılı olaraq, xarici sərmayədarlar bu ilin sonu və ya gələn ilin əvvəlində Azərbaycana gələ bilərlər.
Layihəni təqdim edən Mustafayev qeyd edib ki, investisiya forumunda iştirakda əsas məqsəd investorların diqqətini cəlb etməkdir. "Azərbaycan tərəfi nəticə etibarilə öz məqsədinə çatıb. Yerdə qalan bütün məsələlər tərəflər arasında keçiriləcək danışıqlardan asılı olacaq", - o qeyd edib.
Ələt qəsəbəsindəki liman çoxmodullu olacaq. Belə ki, logistika mərkəzi ilə yanaşı, gələcəkdə bu ərazidə azad iqtisadi zonanın yaradılması da planlaşdırılır.
Ələt qəsəbəsində yeni dəniz limanının tikintisi üç mərhələdə həyata keçiriləcək və 2015-ci ildə başa çatdırılacaq. Layihənin 2008-2010-cu illəri əhatə edən birinci mərhələsində konteynerlərin, "ro-ro" tipli gəmilərin və adi (universal) quru yüklərin qəbulu üçün iki bərə, üç yük körpüsünün inşası nəzərdə tutulur. 2011-2013-cü illəri əhatə edən ikinci mərhələdə daha üç, üçüncü mərhələdə isə (2014-2015) əlavə iki yük körpüsünün inşası nəzərdə tutulur. Limanın inşası layihəsi 400 milyon dollardan çox qiymətləndirilir.
Hazırda TRACECA-ya üzv olan dövlətlər bunlardır: Azərbaycan, Bolqarıstan, Gürcüstan, Qazaxıstan, Qırğızıstan, Ermənistan, Moldova, Rumıniya, Tacikistan, Türkmənistan, Türkiyə, Ukrayna, İran.