Azərbaycan, Bakı, 20 oktyabr /Trend, müxbir E.İsmayılova/
"Bank Melli İran"ın Bakı filialı 2011-ci ildə depozit və kreditlər üzrə indiki faiz dərəcələrini saxlamağı planlaşdırır. Bu barədə çərşənbə günü bank filialının direktor müavini Anar İbrahimov deyib.
"Bankın indiki faiz dərəcələri bizim üçün daha əlverişlidir, həm də ki bank müştərilərinin maraqlarını nəzərə alır, buna görə də biz kredit və depozitlər üzrə faiz dərəcələrini dəyişdirməyi planlaşdırmırıq", - İbrahimov qeyd edib.
Onun sözlərinə görə, perspektivdə kreditlərin verilmə həcminə yenidənbaxılma mümkündür, lakin bank rəhbərliyi tarif siyasətinə hələ ki heç bir dəyişiklik etmək niyyətində deyili.
Bank depozitləri 1 ildən 3 ilədək 3 valyutada - manat, dollar və avroda verir. Filialın direktor müavininin sözlərinə görə, bankın illik depozitləri avroda 7, manat və dollarda 11 faiz cəlb edir. Bank manatla 2 il üçün illik 12 faiz, üç il üçün isə 12,5 faiz üzrə depozitləri cəlb edir.
Bu gün bank kreditləri 23 faiz dərəcəsi ilə 3 il müddətinə verir. Bank avtomobil alışı üzrə 2 il müddətinə illik 26 faiz olmaqla, 30 faizə bərabər ilkin ödənişə görə kreditlər də verir.
Kreditin maksimal məbləği 10 min dollar təşkil edir.
Oktyabrın 20-nə rəsmi məzənnə 0,8014 AZN/USD təşkil edir.
