Azərbaycan, Bakı, 23 oktyabr /Trend , müxbir N.İsmayılova/
2010-cu ilin üç rübü ərzində bütün maliyyə mənbələrindən ölkənin iqtisadi və sosial sahələrinin inkişafına 6157,8 mln manat yatırılıb ki, bu da 2009-ci ilin yanvar-sentyabr aylarında əsas kapitala sərmayə yatırımlarını 15,2 faiz qabaqlayır. Bu barədə Azərbaycanın Dövlət Statistika Komitəsindən şənbə günü məlumat verilib.
Təmir-tikinti işlərinə yatırılan sərmayələrin həcmi 66,2 faiz artaraq, 4077,5 mln manat təşkil edib. İstehsal yönümlü obyektlərin tikintisi üçün 3101,7 mln manat sərmayə istifadə edilib, qeyri-istehsal obyektlərinə isə 3056,1 mln manat yatırılıb.
Xüsusi çəkisi 22,7 faiz olan xarici sərmayələr 1399,8 mln manat təşkil edib. Müvafiq olaraq sərmayələrin ümumi həcmindən 77,3 faiz daxili sərmayələrin payına düşüb. Daxili sərmayələrin böyük hissəsi (72,1 faiz) dövlət müəssisə və təşkilatlarına və yalnız 27,9 faiz özəl qurumlara yatrılıb.
Əsas kapitala yatırılan vəsaitlərin 32 faizi (1 969 mln manat) ölkənin neft sektorunun inkişafına, 68 faiz isə (4188,8 mln manat) qeyri-neft sektorunun, 12 faiz (738,1 mln manat) qeyri-neft sənayesi sektorunun inkişafına yönəldilib.
Bununla yanaşı, sərmayələrin 44 faizi sənaye sahələri; 5,2 faizi - kənd təsərrüfatı və balıqçılıq; 2,6 faizi - ticarət, 24,4 faizi - nəqliyyat; 1,3 faizi - rabitə; 1,5 faizi- səhiyyə, 1,5 faizi - təhsil; 8,9 faizi - daşınmaz əmlak üzrə əməliyyatların (8,8 faizi mənzil tikintisinin); 2,8 faizi istirahət, əyləncə və mədəniyyət, 2,9 faizi dövlət idarəçiliyi; 0,1 faizi maliyyə və sığorta fəaliyyəti; 2,4 faizi yaşayışın təşkili; 0,6 faizi inzibati işlər və xidmətlər 0,5 faiz digər sahələrin payına düşür.
Maliyyələşdirilməsi büdcə vəsaitləri hesabına həyata keçirilən obyektlərin tikintisinə 2010-cu il Dövlət Büdcəsində 3549 mln manat həcmində nəzərdə tutulan vəsaitdən 3569,1 mln manat yаtırılıb.
Müəssisə və təşkilatların hesabına əsas kapitala 3188 mln manat (sərmayələrin ümumi həcminin 51,8 faizi); bank kreditləri hesabına - 318,9 mln manat (5,2 faiz); büdcə vəsaitləri - 20876,8 mln manat (33,9 faiz); büdcədənkənar fondlar - 334,9 mln manat (5,4 faiz); əhalinin şəxsi vəsaitləri - 200 mln manat (3,2 faiz); digər vəsaitlər hesabına isə 28,2 mln manat (0,1 faiz) yatırılıb.
Oktyabrın 23-də rəsmi məzənnə 0,8012 AZN/USD təşkil edir.