Azərbaycan, Bakı, 13 dekabr /Trend, müxbir N.İsmayılova/
2010-cu ilin 9 ayının yekunlarına görə, özəl sektora birbaşa dövlət və dövlətin zəmanətli kreditləri və digər investisiyalar formasında cəlb olunmuş xarici kreditlərin xüsusi çəkisi 60 faiz təşkil edib. Bu barədə ölkənin Mərkəzi Bankının bazar ertəsi yaydığı ödəniş balansında deyilir.
Onların ümumi həcmi 2009-cu ilin analoji dövrü ilə müqayisədə 1,7 dəfə artaraq 3413,7 milyon dollar təşkil edib.
Dövlət zəmanəti və birbaşa dövlət tərəfindən 499,1 milyon dollar (20,9 faiz) məbləğində kreditlər cəlb edilib.
Dövlət təminatı olmayan kreditlərin payına 79,1 faiz düşür (1887,6 milyon dollar). Onların 358,4 milyon dolları beynəlxalq maliyyə təşkilatlarından beynəlxalq neft-qaz müqavilələri çərçivəsində maliyyələşdirmə işləri üçün cəlb olunan borcların payına düşür.
Hesabat dövründə banklar tərəfindən 1336,2 milyon dollar, birgə müəssisələr və firmalar tərəfindən isə 193 milyon dollar xarici borc cəlb edilib.
Bundan əvvəl cəlb edilmiş xarici borcların ümumi həcmindən 1408,7 milyon dollar qaytarılıb. Qaytarılan kreditlərin 56,5 faizi (796,3 milyon dollar) bank sisteminin, 11,4 faiz (160,2 milyon dollar) dövlət və dövlət təminatı olan kreditlərin, 16,1 faiz (226,3 milyon dollar) neft-qaz sektorunun, 16 faiz (225,9 milyon dollar) isə digər müəssisə və firmaların payına düşür.
