Azərbaycan, Bakı, 14 dekabr /Trend, müxbir N.İsmayılova/
Azərbaycan Mərkəzi Bankının (AMB) açıqladığı ödəniş balansına görə, 2010-cu ilin yanvar-sentyabr aylarında ölkənin ödəniş balansında cari əməliyyatların hesab profisiti 12 milyard dollar, o cümlədən qeyri-neft sektorundakı 3,4 milyard dollarlıq defisiti tam ödəyən neft-qaz sektorunun hesablarının cari əməliyyatlarının profisiti 15,4 milyard dollar təşkil edib.
Sektorlar üzrə ödəniş balansının təhlili göstərib ki, əvvəlki illərdə olduğu kimi, 2010-cu ilin yanvar-sentyabrında da neft-qaz sektorundakı xarici iqtisadi əməliyyatlar müsbət, qeyri-neft sektounda isə mənfi saldoya malik olublar. Ödəniş balansının məlumatlarına görə, yanvar-sentyabrda neft-qaz sektorunda yaradılan ümumi müsbət saldo neft-qaz sektorunda 15,3 milyard dollar təşkil edib.
Cari ilin üç rübü ərzində xarici ticarət dövriyyəsinin ümumi həcmi 24,7 milyard dollar, xarici ticarət balansında müsbət saldo isə 15,4 milyard dollar təşkil edib. Mal idxalı 4,66 milyard dollar, ixrac əməliyyatları isə 20,08 milyard dollar olub.
Hesabat dövründə 140 ölkə ilə ticari münasibətlər qurulub. Ticarət dövriyyəsindən 12 faiz MDB ölkələri ilə, 88 faiz isə digər ölkələrlə əməliyyatların payına düşüb. İtaliya, ABŞ, İsrail, Rusiya, Fransa, Türkiyə, Böyük Britaniya, Ukrayna, İndoneziya və Malayziya ilə intensiv ticarət münasibətləri yaradılıb. Azərbaycanın ixrac-idxal əməliyyatlarının 70,6 faizi bu ölkələrin payına düşür.