Azərbaycan, Bakı, 14 dekabr /Trend, müxbir N.İsmayılova/
2010-cu ilin yanvar-noyabrında Azərbaycan ümumi daxili məhsulu (ÜDM) ötən ilin analoji dövr göstəricisi ilə müqayisədə 4,5 faiz və ya 1369,4 milyon manat artıb. Bu barədə çərşənbə axşamı Dövlət Statistika Komitəsindən deyilib. Hazırkı qiymətlərlə ÜDM 36,6 milyard manat təşkil edib. Adambaşına düşən ÜDM-in həcmi 3,2 faiz artaraq 4096,4 manat (5101,4 dollar) olub.
2010-cu ilin yanvar-noyabrında qeyri-neft sektorunda ÜDM istehsalı 5,9 faiz artaraq ÜDM-da 42,4 faiz təşkil edib, 50,7 faiz neft-qaz sektorunun (artım 2,6 faiz) payına düşüb. Əlavə dəyərin 6,9 faizi məhsul və idxaldan xalis vergilər hesabına yaradılıb.
İqtisadiyyatın bütün sahələrində məhsul istehsalının ümumi həcmi 3,4 faiz artaraq ÜDM-in 66,1 faizini təşkil edib ki, onun da əsas hissəsi (53,9 faiz və ya 19,7 milyard manat) sənayenin payına düşür. Xidmət sahəsində əlavə dəyər istehsalı ötən ilin analoji dövrü ilə müqayisədə 6,2 faiz artıb və ÜDM-in 3,4 faizini təşkil edib.
Yanvar-noyabrda kənd təsərrüfatı, ov sektoru və meşəçilikdə 1,8 milyard manat əlavə dəyər istehsal olunub ki, bu da ümumi ÜDM-in 4,9 faizidir. Bu rəqəmlər tikinti sektorunda 2,7 milyard manat (7,3 faiz), nəqliyyat və anbar təsərrüfatında 2,2 milyard manat (6 faiz), rabitə və poçt xidmətlərində 699,5 milyon manat (1,9 faiz), sosial və digər xidmətlərin göstərilməsində isə 4 milyard manatdır (11 faiz).
Dekabrın 14-nə olan rəsmi məzənnə 0,7987 AZN/USD təşkil edir.