Azərbaycan, Bakı, 15 dekabr /Trend, müxbir İ.Xəlilova/
"Paşa Holding" qrupuna daxil olan "Paşa Həyat Sığorta" sığorta şirkəti qısamüddətli perspektivdə xarici səhmdarların cəlb edilməsini planlaşdırmır. Bu barədə Trend-ə çərşənbə günü "Paşa Sığorta" şirkətinin idarə heyətinin sədri Nofəl Rzayev deyib. "Paşa Həyat Sığorta" dövlət qeydiyyatından keçib və hazırda ölkənin Maliyyə Nazirliyindən sığorta fəaliyyəti üçün lisenziyanı almaq mərhələsindədir.
"Paşa Sığorta"nın həyat sığortası sahəsində iş təcrübəsini nəzərə alaraq, bizim praktiki olaraq aparıcı həyat sığortaçıları, xüsusən də Almaniyanın "Allianz" və "Gen Re Life" şirkətləri ilə çox yaxşı tərəfdaşlıq münasibətlərimiz var, - Razayev bildirib. - Bu qarşılıqlı biznes-tərəfdaşlıq münasibətləri "Paşa Həyat Sığorta" tərəffindən davam etdiriləcək və bu əməkdaşlıq investisiya əməkdaşlığını nəzərdə tutmur".
"Paşa Həyat Sığorta"nın komandası bu xarici sığorta şirkətlərində təlim proqramı keçib.
"Paşa Həyat Sığorta"nın fəaliyyətə başlaması gələn ilin əvvəlində gözlənilir. Bundan sonra "Paşa Sığorta" ona bu günədək orta hesabla 300 min manat səviyyəsində formalaşan həyat sığortası üzrə portfelini verməyi planlaşdırır. Şirkət fəaliyyətə 7 milyon manatlıq ilkin kapitalla başlayıb və səhmlərin emissiyalar prospekti artıq Azərbaycanın Qiymətli Kağızlar üzrə Dövlət Komitəsində qeydiyyatdan keçib.
"Paşa Həyat Sığorta"nın idarə heyətinin sədri Mürsəl Rüstəmov təyin edilib. Onun yeganə müavini isə eyni zamanda şirkətin baş texniki direktoru olan Niyazi İsmayılovdur.
Hazırda ölkədə həyat sığortası üzrə iki ixtisaslaşmış şirkət - "Atəşgah Həyat" və "Qala Həyat" fəaliyyət göstərir.
"Paşa Sığorta" "Paşa Holdinq" qrupunun üzvüdür və sığortanın 31 növü üzrə korporativ və fərdi müştərilərə xidmət göstərir. 20 milyon manat nizamnamə kapitalı və 28 milyon manat ümumi aktivləri ilə "Paşa Sığorta" kapitallaşdırmanın həcminə görə, ölkənin ilk üç sığortaçısı siyahısına daxil olmaqla, sığorta sektorunda biznesin rentabelliliyini qorumaqda ən yüksək göstəricilərə malikdir.
2007-ci ildən "Paşa Sığorta" Böyük Britaniyanın "Moody International" agentliyi tərəfindən sığorta məhsullarının ISO 9001:2000 keyfiyyət idarəetmə standartlarına və xidmətlərinə uyğunluq səviyyəsinə görə sertifikatla təltif olunub. 2009-cu ildən etibarən "Paşa Sığorta" BMT-nin İnsan hüquqlarının, ətraf mühitin müdafiəsi və korrupsiyanın qarşısının alınması üzrə Qlobal Müqavilənin (UN Global Compact Initiative) iştirakçısıdır.