Azərbaycan, Bakı, 25 dekabr /Trend, müxbir İ.Xəlilova/
Gələn ildən etibarən Azərbaycan Dövlət Gömrük Komitəsi (DGK) gömrük xidməti və xarici iqtisadi fəaliyyət iştirakçıları arasında etibarın artırılması, məsələn, gömrük qanunvericiliyinə ciddi riayət edəcək xarici iqtisadi fəaliyyət iştirakçılarına gömrük güzəştlərinin tətbiqi ilə bağlı məlumat vermək məqsədilə mütəmadi görüşlər keçirmək niyyətindədir. Bu barədə DGK-ın Gömrük Nəzarətinin Təşkili Baş İdarəsinin rəisi Şahin Bağırov cümə günü gömrük brokerləri və nəqliyyat-ekspedisiya şirkətlərinin nümayəndələri ilə görüşdə deyib.
Onun sözlərinə görə, artıq Azərbaycanın yeni Gömrük Məcəlləsinin layihəsi baxılmaq üçün Milli Məclisə təqdim edilib. Layihədə gömrük işində fəaliyyət sahələri dəqiqləşdirilib, ticarətin asanlaşdırılması, eləcə də təhlükəsizliyin təmin edilməsi məsələlərinə yeni yanaşmalar əksini tapıb.
Bundan başqa, yeni Gömrük Məcəlləsinin layihəsində gömrük xidməti və xarici iqtisadi fəaliyyət iştirakçıları arasında etibarın artırılması tədbirləri, məsələn, gömrük qanunvericiliyinə ciddi riayət edəcək xarici iqtisadi fəaliyyət iştirakçılarına gömrük güzəştlərinin tətbiqi nəzərdə tutulub.
Bağırov xatırladıb ki, yeni Gömrük Məcəlləsinin layihəsini yerli və beynəlxalq mütəxəssislər birgə işləmişlər. Bununla əlaqədar iş adamları ilə görüşlər də keçirilib və onlar məlumatlandırılıb. Eyni zamanda, rəy və təkliflər öyrənilib və bunlar layihənin hazırlanması zamanı nəzərə alınıb.
Görüşdə gömrük sahəsində tətbiq edilən "bir pəncərə" prinsipi, Vahid Avtomatlaşdırılmış İdarəetmə Sistemi (VAİS), gömrük nəzarəti və gömrük rəsmiləşdirilməsində istifadə olunan digər yeni texnologiyalar, eləcə də Dövlət Gömrük Komitəsinin yeni internet səhifəsindəki "Nəqliyyat operatorlarının qeydiyyatı" bölməsi təqdim edilib.