Azərbaycan, Bakı, 18 yanvar /Trend, müxbir E.İsmayılov/
Martda Bakı Metropoliteni yeni "Avtovağzal" stansiyasının tikintisi çərçivəsində tunelin çəkilişinə başlamağı planlaşdırır. Bu barədə çərşənbə axşamı Bakı Metropolitenindəki mənbə bildirib.
Onun sözlərinə görə, tunelin çəkilişi Almaniyanın "Herrenknecht" şirkətinin istehsalı olan yeni avadanlıqdan istifadə olunmaqla həyata keçiriləcək. Tunel çəkilişi zamanı belə metoddan Azərbaycanda ilk dəfə istifadə olunacaq.
"Hazırda yeni qurğu tikinti meydançasındadır və onun kapsulları üçün tikintı işləri apaılır. Yeni qurğunun martda işə başlaması planlaşdırılır", - mənbə deyib.
Bir müddət əvvəl Metropolitendəki mənbənin məlumatına görə, "Memar Əcəmi-2"nin iki ilk stansiyası və "Avtovağzal"ın üçüncü qolunun tikintisi 2012-ci ilin sonlarında başa çatacaq.
Bakı Metropoliteninin aldığı yeni qurğu vasitəsilə gündəlik qazma 25 metr təşkil edir ki, bu da yeni stansiyalar üçün tunellərin çəkilişi prosesini xeyli sürətləndirəcək.
Bakı Metropoliteni 1967-ci ildən fəaliyyət göstərir və 22 stansiyaya malikdir.