Azərbaycan, Bakı, 7 aprel /Trend/
AXA MBASK sığorta şirkəti pərakəndə satışın sığorta agentlikləri şəbəkəsi vasitəsilə inkişaf etdirilməsi planına müvafiq olaraq, iş adamlarına, sahibkarlara, sığorta agenti fəaliyyəti ilə məşğul olan və ya olmaq istəyən şəxslərə "AXA MBASK" brendi altında sığorta agentliyi açaraq yüksək gəlir əldə etməyi təklif edir. Trend-in məlumatına görə, bu barədə şirkətin cümə axşamı yaydığı məlumatda deyilir.
Şirkət, öz növbəsində, bu sahədə əməkdaşlıqda maraqlı olan bütün hüquqi və fiziki şəxslərə dəstək göstərəcəyini bəyan edir.
AXA Group dünyanın 57 ölkəsində fəaliyyət göstərir və dünyanın ən böyük sığorta şirkətidir. Fəaliyyət göstərdiyi ölkələrdə AXA şirkəti sığorta agentliklərinin açılmasını dəstəkləyərək, həmin agentliklərlə uzunmüddətli əməkdaşlıq edir, agentliklərin inkişafında və yüksək gəlir əldə etməsində mühüm rol oynayır.
AXA MBASK Sığorta Şirkəti sığorta agentlərinin fəaliyyətini tənzimləyən qanunvericiliyin tələbləri ilə bağlı bütün məsələlərdə sahibkarlara və işgüzar şəxslərə məsləhətlər verməyə və daimi yardım etməyə hazırdır. Bu məqsədlə şirkət daxilində xüsusi yaradılmış Agent Mərkəzi fəaliyyət göstərir.
Həmçinin, AXA MBASK sahibkarlara və işgüzar şəxslərə sığorta agentliyinin açılmasında və ya mövcud bizneslərini davam etdirməklə sığorta agenti xidmətləri göstərib əlavə gəlir əldə etmələrində hər cür dəstək verəcəyini bildirir. Xüsusilə də müstəsna olaraq sığorta agenti fəaliyyəti ilə məşğul olan hüquqi şəxs yaratmaqda maraqlı olan şəxslərə əlavə olaraq agentliklərin inkişafı proqramı çərçivəsində kompleks dəstək verilir.
Eyni zamanda, AXA MBASK Sığorta Şirkəti tərəfindən hazırda sığorta fəaliyyəti ilə məşğul olan şəxslərə, o cümlədən lisenziyası olan sığorta agentlərinə beynəlxalq standartlara və Azərbaycan Respublikasının qanunvericiliyinə uyğun şəkildə sığorta agentliklərinin yaradılmasında hər cür dəstək verilir və buna şərait yaradılır.
Bakı şəhərində və respublikanın istənilən regionunda agentlik açmaq istəyən şəxslər, şirkətin korporativ saytında yerləşən müvafiq ərizə formasını doldurub AXA MBASK Sığorta Şirkətinin ofislərinə təqdim edə bilərlər. Daha ətraflı məlumat www.axambask.az saytında yerləşdirilib.
Ötən ilin oktyabr ayında MBASK Sığorta Şirkəti özünün əsas səhmdarını dəyişib. Şirkətin səhmlərinin nəzarət zərfini (51%) özünün törəmə şirkəti olan AXA Sequros Generales, S.A, De Sequros Y Reasequros (İspaniya) şirkəti vasitəsilə AXA Group (Fransa) şirkəti əldə edib. 2010-cu ilin dekabr ayının 7-də MBASK-ın lisenziyası şirkətin adının dəyişdirilməsi ilə əlaqədar AXA MBASK-a dəyişdirilib.
AXA Group - maliyyə müdafiəsi sahəsində dünya lideridir. АХА Group öz fəaliyyətini, Avropa, Şimali Amerika və Asiya-Sakit okeanı regionunda daha çox cəmləşdirməklə, bütün dünya üzrə 57 ölkədə həyata keçirir.