Azərbaycan, Bakı, 15 aprel /Trend, müxbir N.İsmayılova/
2011-ci ilin birinci rübü ərzində Azərbaycanın ümumi daxili məhsulu (ÜDM) ötən ilin müvafiq dövrü ilə müqayisədə 1,6 faiz və ya 149,5 milyon manat artıb. Bu barədə Azərbaycan Dövlət Statistika Komitəsindən bildiriblər. Cari qiymətlərdə ÜDM göstəricisi 10,4 milyard manat olub. Əhalinin payına düşən ÜDM-in həcmi 1157,4 manat (1455,1 dollar) olub.
İl ərzində 5,6 faiz artan qeyri-neft sektorunun payı ÜDM-in 47,1 faizini (4,9 milyard manat) təşkil edib, 52,5 faiz (5,5 milyard manat) isə neft-qaz sektorunun payına düşərək il ərzində 1,9 faiz azalıb.
İqtisadiyyatın bütün sahələrində istehsalın ümumi həcmi 1,9 faiz azalaraq ÜDM-in 63,8 faizini təşkil edib. Burada ÜDM-in 55,7 faizi (5,81 milyard manat) sənayenin payına düşür. Xidmətlər sahəsində əlavə dəyər istehsalı 2010-cu ilin birinci rübü ilə müqayisədə 8,7 faiz artaraq ÜDM-in 29,8 faizini təşkil edib.
İlin birinci rübündə kənd təsərrüfatında, balıqçılıqda və meşə təsərrüfatında 277,4 milyon manat əlavə dəyər hasil edilib ki, bu da qeyri-neft ÜDM-in 5,6 faizini təşkil edir. Tikintidə - 555,3 milyon manat (11,2 faiz), nəqliyyat və anbar təsərrüfatında - 770,6 milyon manat (15,6 faiz), rabitə və poçt xidmətlərində - 194,1 milyon manat (3,9 faiz), sosial və digər sahələrdə - 1,2 milyard manat (24 faiz), pərakəndə və topdansatışda, avtomobil və motosikletlərin təmirində - 816,7 milyon manat (16,5 faiz), mehmanxana biznesi və ümumi qida sahəsində - 141,5 milyon manat (2,9 faiz) əlavə dəyər hasil edilib.
Aprelin 15-nə olan rəsmi məzənnə 0,7927 AZN/USD təşkil edir.