Azərbaycan, Bakı, 21 aprel /Trend, müxbir İ.Xəlilova/
Almaniya İnkişaf Bankı - KfW aprelin sonunadək Azərbaycan Maliyyə Nazirliyinə kiçik və orta sahibkarlığın dəstəklənməsi üçün beş milyon avro həcmində üçüncü güzəştli kreditin verilməsi ilə bağlı rəsmi müraciət etməyi planlaşdırır. Bu barədə cümə axşamı Trend-ə KfW-nin Bakı ofisindən məlumat verilib.
"Rəsmi müsbət cavab alınacağı halda, biz bankla Azərbaycan hökuməti arasında maliyyə müqaviləsini hazırlayacağıq, - KfW ofisindən deyiblər. - Habelə kreditin ölkədəki hazırkı iqtisadi vəziyyətlə bağlı əvvəlki iki kreditin şərtlərindən fərqlənə biləcək şərtlərinin razılaşdırılması, eləcə də KfW tərəfindən maliyyələşmə şərtlərinin dəyişməsi ilə bağlı danışıqlar aparıla bilər".
Azərbaycan hökuməti banka müraciət edərək ölkənin əvvəllər imtina etdiyi üçüncü kreditin alınması barədə istəyini ifadə edib. Bununla əlaqədar hazırda ölkənin İqtisadi İnkişaf və Maliyyə nazirlikləri tərəfindən konsepsiyaların razılaşdırılması aparılır.
Əvvəlki iki kredit kimi bu vəsaitlər də Almaniya-Azərbaycan Fondu (AAF) vasitəsilə kiçik və orta sahibkarlığın maliyyələşdirilməsi üçün nəzərdə tutulub.
KfW əvvəlcə sahibkarlığın inkişafı üçün Azərbaycana 20 milyon avro birləşdirilmiş kredit təklif edib. Bu vəsaitin 5 milyon avrosu əvvəl olduğu kimi bankın öz vəsaitlərindən, yüngül şərtlərlə - 10 il güzəştli dövr olmaqla, 40 il müddətinə və illik 0,75 faiz dərəcəsi ilə nəzərdə tutulub. KfW vəsaitin qalan hissəsini (15 milyon avro) kapital bazarından götürməlidir və bununla əlaqədar o, kommersiya şərtləri ilə olacaq. Azərbaycan hökuməti kreditin kommersiya hissəsindən imtina edib, lakin güzəştli hissənin alınması ilə bağlı heç cür razılığa gələ bilməmişdi.
Almaniya bankı 1999-cu ildən AAF-yə iki tranşla 8,7 milyon avro təqdim edib. Bu vəsait artıq mənimsənilib və hazırda banklar revolver hissədən və fondun fəaliyyətə başladığı andan əldə edilən gəlirdən maliyyələşdirilir. Hazırda AAF-in cari portfeli orta hesabla 10 milyon avro təşkil edir. Fəaliyyətə başladıqdan ötən ilin dekabr ayınadək Almaniya-Azərbaycan Fondu öz şəxsi vəsaitləri hesabına ümumi məbləği 103 milyon avro olan 26 min krediti maliyyələşdirib.
2001-ci ilin martından AAF-in tərədaşları "Bank of Baku" və "Unibank", 2003-cü ilin yanvarından "Parabank" və "Bank Respublika", 2004-cü ilin sentyabrından "DəmirBank" (əvvəllər "Azərdəmiryolbank") və "AGBank", 2006-cı ilin dekabrından "Rabitəbank" və "Muğanbank", 2007-ci ilin fevralından isə "Nikoil Bank"dır.