Azərbaycan, Bakı, 14 may /Trend/
Cari ilin əvvəlindən (İranda il martın 21-də dəyişir) İranın Qərbi Azərbaycan əyalətindən Naxçıvan Muxtar Respublikasına bir milyon dollar dəyərində müxtəlif növ məhsul ixrac olunub. Bunu İranın Qərbi Azərbaycan əyalətinin Sərhəd keçid məntəqələrinə Nəzarət İdarəsinin rəhbəri Pərviz Təqəvi deyib. Bu barədə Trend İranın MEHR xəbər agentliyinə istinadən məlumat verir.
Təqəvi əlavə edib ki, yaxın gələcəkdə Qərbi Azərbaycan ilə Naxçıvan MR arasında yerləşən Poldəşt keçid məntəqəsi iki növbədə fəaliyyətə başlayacaq.
"Sərhəd keçid məntəqəsinin iki növbədə fəaliyyət göstərməsi regionda iqtisadi inkişafa təkan verəcək", - Təqəvi deyib.
O, əlavə edib ki, Qərbi Azərbaycanın Naxçıvan MR-lə ticari əlaqələrinin inkişaf etdirilməsi məqsədilə bu ilin birinci yarısından Poldəşt sərhəd keçid məntəqəsindən minik avtomobilləri və sərnişin avtobuslarının gediş-gəlişi mümkün olacaq.
Təqəvinin sözlərinə görə, cari ilin sonuna kimi Poldəşt sərhəd keçid məntəqəsində əsaslı işlər görüləcək və o beynəlxalq statuslu sərhəd keçid məntəqəsinə çevriləcək.
