Azərbaycan, Bakı, 18 may /Trend, müxbir A.Axundov/
Azərbaycanın sığorta bazarının inkişafına bu gün heç nə mane olmur. Bu barədə Azərbaycan Sığortaçılar Assosiasiyasının icraçı direktoru Azər Əliyev deyib.
"İnkişaf üçün bizim hər şeyimiz var. İqitisadiyyat inkişaf edir, ölkəyə pul axını var. Dövlət tərəfindən ölkənin sığorta bazarının inkişafına kömək etmək istəyi də var. Onlar öz funksiyalarını yerinə yetirirlər, yeni qanunların qəbulu üzərində iş aparılır, qəbul edildikdən sonra onların icrasına nəzarət olacaq. Kadr potensialı ilə də bağlı problem yoxdur. Belə ki, bizim yaxşı, savadlı sığortaçılarımız var", - Trend-ə Əliyev bildirib.
Onun sözlərinə görə, indi yeganə maneə bütün tərəflərdə və ilk növbədə sığortaçılarda müəyyən fəallığın olmamasındadır.
"İnkişafın yaxşı nümunəsi istehsalatda işçilərin icbari sığortası haqqında qanunun qəbul edilməsidir. Dövlət Sığorta Nəzarəti Xidməti, Milli Məclis, Prezident Administrasiyası, sığortaçıların, Əmək və Əhalinin Sosial Müdafiəsi Nazirliyinin timsalında nəzarət orqanlarının çətin işi, təbliğat işləri sayəsində bazar orta hesabla 10 milyon manat yığıb. Bu, 15 faizə yaxın artım deməkdir. Artıq ödənişlər etmək üçün böyük məbləğlər var. Yəni bu mexanizm işə düşüb", - Əliyev bildirib.
2011-ci ilin yanvar-aprelində Azərbaycan sığorat şirkətlərinin istehsalatda peşə xəstəlikləri və bədbəxt hadisələr nəticəsində əmək qabiliyyətinin itirilməsində icbari sığorta üzrə sığorta haqları 8 708 684,95 manat təşkil edib. Bu, yanvar-mart göstəricisini 46,13 faiz üstələyir. Bu barədə Azərbaycan Maliyyə Nazirliyinin sığortaçıların ilk dörd ay ərzində fəaliyyət yekunları üzrə hesabatında deyilir.
"Biz tez-tez şikayət edirik ki, ölkədə sığorta mədəniyyəti çox aşağı səviyyədədir, lakin mən bununla razı deyiləm. Bizim əhali savadlıdır və insanlara sığortanın üstünlüklərini düzgün izah etməklə biz onların sığorta mədəniyyətini artıra bilərik", - Əliyev vurğulayıb.
Onun sözlərinə görə, ilyarımdan sonra Azərbaycanın sığorta bazarı bir neçə dəfə arta bilər.
İlk dörd ay ərzində ölkədə fəaliyyət göstərən bütün şirkətlrəin sığorta haqlarının ümumi həcmi 66,342 milyon manat (23,47 faiz artım) təşkil edib. Hesabat dövrü ərzində ödənişlər 17,673 milyon manat (21,71 faiz artım) məbləğində həyata keçirilib.
Azərbaycanda cəmi 28 sığorta və bir təkrar sığorta şirkəti fəaliyyət göstərir.
Mayın 18-nə olan rəsmi məzənnə 0,7905 AZN/USD təşkil edir.
