Azərbaycan, Bakı, 24 may /Trend, müxbir A.Axundov/
Apreldə Bakının ilkin mənzil bazarında məznilin 1 kvadratmetrinin qiyməti ötən aya nisbətdə dəyişməz qalıb və 841 manat təşkil edib. Bu barədə "Əmlak Bazarı İştirakçıları" İctimai Birliyindən Trend-ə məlumat verilib.
"Rübün və ilin əvvəli ilə müqayisədə fərq göstəricisi 0,8 faiz olaraq qalıb. Ötən ilin müvafiq dövrü ilə müqayisədə qiymət azalması 3,4 faiz təşkil edib. İqtisadi böhranın ilk dövrləri ilə müqayisədə (2008, sentyabr) bu göstəricidə 29,6 faiz azalma qeydə alınıb", - təşkilatın məlumatında deyilir.
Bakıda aprel ayında araşdırmalar zamanı Xətai rayonunda yalnız bir binanın satışdan çıxması müşahidə edilib.
Beləliklə, apreldə paytaxt üzrə yeni tikililərin sayı əvvəlki ayda qeydə alınan 438-ə qarşı 437 ədəd olub. Tikinti şirkətlərinin sayında da heç bir dəyişiklik baş verməyib və ötən aydakı kimi 155 ədəd olaraq qalıb.
Məlumata əsasən, daşınmaz əmlak obyektlərinin alqı-satqısı prosesində fəallığın azalması müşahidə edilib.
"Aktiv bazar iştirakçıları olan rieltorlar yalnız ilkin mənzil bazarının deyil, ümumilikdə daşınmaz əmlak bazarında aktivliyin sentyabr və oktyabr aylarında başlayacağını bildirirlər", - məlumatda qeyd edilib.
Araşdırmalara əsaslanaraq qeyd etmək olar ki, alıcı kütləsi hazırda da 1 kvadratmetri 500-600 manat arasında dəyişən yeni tikililərə üstünlük verir.
Mayın 24-nə olan rəsmi məzənnə 0,79AZN/USD təşkil edir.
