...

Bakıda Bakı-Tbilisi-Qars dəmiryol layihəsi çərçivəsində Əlaqələndirmə Şurasının iclası keçiriləcək

Biznes və iqtisadiyyat xəbərləri Materials 28 İyun 2011 14:17 (UTC +04:00)

Azərbaycan, Bakı, 28 iyun /Trend, müxbir E.İsmayılov/

İyulun 1-də Bakıda Azərbaycan, Gürcüstan və Türkiyənin dəmiryol sistemlərini birləşdirəcək Bakı-Tbilisi-Qars dəmiryol layihəsinin tikintisi çərçivəsində Əlaqələndirmə Şurasının iclası keçiriləcək. Bu barədə çərşənbə axşamı Azərbaycan Nəqliyyat Nazirliyinin İqtisadiyyat və nəqliyyat siyasəti şöbəsinin rəhbəri Sədrəddin Məmmədov deyib. Görüş Azərbaycan və Gürcüstanın Nəqliyyat nazirliklərinin nümayəndələrinin iştirakı ilə keçiriləcək.

Onun sözlərinə görə, iclas zamanı layihə çərçivəsində görülən işlərin, Marabda stansiyasının tikintisi, eləcə də lokomotivlərin istehsalı üzrə dünyaca məşhur İspaniyanın "Talgo" şirkətindən lokomotiv və sürətli sərnişin qatarlarının alınması məsələlərinin müzakirəsi planlaşdırılır.

"İclas çərçivəsində 2011-ci il üçün layihənin büdcəsinə dəqiqləşdirmələr təqdim ediləcək", - Məmmədov vurğulayıb.

Məmmədovun sözlərinə görə, Azərbaycan tərəfinin ikinci kredit çərçivəsində Gürcüstan ərazisində tikinti və bərpa işlərinə ayıracağı əlavə vəsaitlər layihə çərçivəsində nəzərdə tutulan işlərin başa çatdırılması üçün kifayət edəcək.

Bakı-Tbilisi-Qars dəmiryolunun Gürcüstan hissəsinin tikintisi üçün Azərbaycan Gürcüstana 25 il müddətinə illik 5 faizlə əlavə 575 milyon dollar ayırıb. Ayrılan vəsaitlər dəmiryolun Tetritskaro-Axalkalaki hissəsinin tikintisinə və bərpasına, Axalkalakidə dəmiryol vağzalının tikintisinə, eləcə də digər dəmiryol infrastrukturunun tikintisinə yönələcək.

Bu kredit "Kartsaxi-Marabda" şirkətinə ayrılıb və dövlət borcu deyil. Bu kredit dəmiryol işə salındıqdan sonra layihənin həyata keçirilməsindən əldə ediləcək gəlirdən qaytarılacaq.

Gürcüstan üçün 200 milyon dollar məbləğində birinci tranş da 25 il müddətinə, lakin illik bir faiz dərəcə ilə ayrılıb.

Azərbaycan və Gürcüstan hökumətləri arasında dəmiryolun Marabda-Türkiyə sərhədi (Kartsaxi) hissəsinin maliyyələşdirilməsi, layihələşdirilməsi, tikintisi və reabilitasiyası işlərinə dair sazişə edilən düzəlişlərə görə, kredit xəttinin ümumi həcmi 775 milyon dollar təşkil edir.

Bakı-Tbilisi-Qars dəmiryolunun Gürcüstan hissəsinin tikintisi və reabilitasiyasının maliyyələşdirilməsi Azərbaycan Respublikası Dövlət Neft Fondu tərəfindən həyata keçirilir.

Bakı-Tbilisi-Qars layihəsi çərçivəsində dəmiryol magistralının yeni 105 km.-lik qolunun tikintisi də planlaşdırılır. Bunun 76 km.-i Türkiyə, 29 km.-i isə Gürcüstan ərazisindən keçəcək. Bundan əlavə, nəqletmə gücünü ildə 15 milyon ton yükə çatdırmaq üçün Gürcüstanda 183 km.-lik Axalkalaki-Marabda-Tbilisi dəmir yolunun 183 km.-lik hissəsi yenidən qurulacaq. Axalkalakidə Gürcüstanda mövcud olan dəmiryol təkərlərinin Avropa standartlarına uyğun təkərlərlə əvəz edilməsi üzrə məntəqələrin tikilməsi də planlaşdırılır.

Bundan əvvəl Azərbaycanın nəqliyyat naziri Ziya Məmmədovun verdiyi məlumata görə, tikinti işlərinin 2012-ci ilin birinci yarısında başa çatdırılması planlaşdırılıb. Lakin layihənin həyata keçirilmə müddətinin razılaşdırılmasına baxmayaraq, tərəflər prosesin sürətləndirilməsi və işlərin böyük hissəsinin 2011-ci ilin sonunadək başa çatdırılması üzərində işləyirlər.

Dəhlizin yüksək buraxılış qabiliyyəti 17 milyon ton yük təşkil edəcək. İlkin mərhələdə bu göstərici 1 milyon sərnişin və 6,5 milyon ton yük təşkil edəcək.

Xəbər lenti

Xəbər lenti