Azərbaycan, Bakı, 2 avqust /Trend, müxbir E.İsmayılov/
2013-cü ilin yayına Bakı Metropoliteninin "Elmlər Akademiyası" stansiyasından əlavə çıxışların tikintisinin başa çatdırılması planlaşdırılır. Bu barədə çərşənbə axşamı Trend-ə Bakı Metropolitenindəki mənbə deyib.
Onun sözlərinə görə, 4 əlavə çıxış tikiləcək. Onların 2-si Bakı Dövlət Universitetinə, qalan 2-si isə avtomobil yollarına çıxacaq.
"Tikinti işlərinə artıq başlanılıb və maliyyələşdirmə ilə bağlı problem olmasa, işlərin hamısını 2 ildən sonra başa çatdırmaq planlaşdırılır", - mənbə bildirib.
Əlavə çıxışların tikintisi həm sərnişinlərin təhlükəsizliyinin təmini, həm də "Elmlər Akademiyası" stansiyasının yaxınlığında yerləşən təhsil müəssisələrinə daha rahat gediş-gəliş baxımından zəruridir.
Bakı Metropoliteni 1967-ci ildən fəaliyyət göstərir və 22 stansiyaya malikdir.