Azərbaycan, Bakı, 2 avqust /Trend, müxbir İ.Xəlilova/
Azərbaycanda poçt əmanət sisteminin inkişafı ilə poçt şöbələrinin təqdim edə biləcəyi maliyyə xidmətlərinin siyahısının genişləndirilməsi nəzərdə tutulur.
Milli poçt rabitəsi operatoru "Azərpoçt" MMC-nin maliyyə xidmətlərinin göstərilməsi sahəsində potensialının gücləndirilməsi ilə təşkilata poçt əmanətlərinin qəbul edilməsi, kredit kartlarının buraxılması, əməliyyatların aparılmasına icazə verilməsi məsələsinə milli poçt operatorunun maliyyə xidmətlərinin göstərilməsi sahəsində potensialı gücləndirildikcə mərhələli şəkildə baxılacaq. Bu barədə Trend-ə Azərbaycan Mərkəzi Bankından (AMB) bildirilib.
"Azərpoçt"un layihəsi çərçivəsində milli poçt operatorunun 1200-dək filialı vasitəsilə əhalinin müxtəlif növ maliyyə xidmətlərinə çıxış imkanlarının yaxşılaşdırılması nəzərdə tutulub. Hazırda 800-dək poçt şöbəsinin fəaliyyəti lisenziyalaşdırılıb", - AMB-dən deyilib.
MMC-nin lisenziyalaşdırılmış şöbələrinə poçt hesablarının açılması və aparılması, pul köçürmələri, debet kartların buraxılışı, müştərilərin sifarişi və vəsaiti hesabına xarici valyutanın alqı-satqısı üzrə əməliyyatlara icazə verilib.
Beynəlxalq kartların buraxılması üçün "Azərpoçt" MMC "MasterCard" beynəlxalq ödəniş sistemi ilə danışıqlara başlayıb. Bundan əvvəl Rabitə və İnformasiya Texnoloiyaları Nazirliyinin poçt rabitəsi şöbəsinin müdiri, Regional Rabitə Birliyinin poçt rabitəsi üzrə komissiyasının sədri Novruz Məmmədovun dediyinə görə, paralel olaraq "Visa International" sistemi ilə danışıqlar aparılır. Onunla danışqılar 2011-ci ilin əvvəlində başlayıb.
Hazırda poçt operatoru daxilikorporativ səviyyədə istifadə olunan lokal plastik kartların emissiyasına da başlayıb. Poçt operatorunun buraxdığı plastik kartlara "MilliKart" prosessinq mərkəzindən xidmət göstərilir. "Azərpoçt" MMC əhaliyyə maliyyə xidmətlərinin göstərilməsinə 2010-cu ilin ortalarında başlayıb.
Poçt operatoru tərəfindən bank xidmətləri avtomatlaşdırılmış korporativ informasiya sistemi vasitəsilə həyata keçirilir. Məmmədovun sözlərinə görə, sistemə artıq poçt rabitəsinin 700-dən çox şöbə və filialları qoşulub.