Azərbaycan, Bakı, 1 sentyabr /Trend, müxbir, N.İsmayılova/
"Moody's Investors Service" agentliyi tərəfindən Rusiya və MDB bankları üzrə aparılan tədqiqatlar göstərir ki, əlaqəli tərəflərin kreditləşdirilməsi yüksək səviyyədədir və bu, region banklarının struktur çatışmazlığıdır. Trend-in məlumatına görə, bu barədə şirkətin cümə axşamı yaydığı məlumatda deyilir.
Əlaqəli tərəflərin kreditləşdirilməsi MDB ölkələrinin banklarında problemli kreditlərin yüksək səviyyəsini şərtləndirən əsas amillərdən biridir.
"Moody's" agentliyinin məlumatına görə, problemli və yenidən strukturlaşdırılmış borclar 2011-ci ilin ortalarında orta hesabla bütün kreditlərin 20 faizini təşkil edir. 2010-cu ilin sonunda MBD bankları tərəfindən əlaqəli tərəflərə verilən kreditlərin orta səviyyəsi kreditlərin ümumi həcminin 10 faizini və bankların səhmdar kapitalının 50 faizini təşkil edib. Bu, Mərkəzi və Şərqi Avropa banklarından beş dəfə, Yaxın Şərq banklarından isə iki dəfə çoxdur.
Müxtəlif ölkələrdə əlaqəli tərəflərə kreditlərin verilməsi sahəsindəki tendensiyalar müxtəlifdir. Rusiya bankları insayderlərə verilən kreditlərin həcmini kredit bazarındakı canlanma ilə əlaqədar 2009-cu ildə kapitalın 43 faizindən 2010-cu ildə 41 faizədək azaldıblar. Qazaxıstan və Ukraynada da müsbət tendensiyalar nəzərə çarpır. Agentliyin məlumatında deyilir ki, bununla yanaşı, Azərbaycan, Belarus və Özbəkistan bankları əlaqəli tərəflərin kreditləşdirilməsini artırıblar.