Azərbaycan, Bakı, 13 sentyabr /Trend, müxbir İ.Xəlilova/
Cari ilin oktyabr ayının əvvəlində Rusiya Baş nazirinin müavini və ticari-iqtisadi əməkdaşlıq üzrə Azərbaycan-Rusiya hökumətlararası komissiyasının həmsədri Aleksandr Xloponinin Azərbaycana səfəri gözlənilir. Bu barədə Trend-ə çərşənbə axşamı Azərbaycan hökumətindən bildiriblər.
Xloponin, həmçinin Rusiya Prezidentinin Şimali Qafqaz federal dairəsi üzrə səlahiyyətli nümayəndəsidir.
"Hazırda Xloponinin Azərbaycana səfər proqramını müzakirə etmək üçün qrup Bakıdadır", - Rusiyanın Azərbaycandakı ticarət nümayəndəsi Yuri Şedrin çərşənbə axşamı Trend-ə bildirib.
Onun sözlərinə görə, səfər zamanı Şimali Qafqaz federal dairəsi subyektləri ilə sazişlərin imzalanması mümkündür.
Şedrinin sözlərinə görə, hökumətlərarası komissiyanın həmsədrləri Aleksandr Xloponin və Yaqub Eyyubovun görüşündə ikitərəfli iqtisadi əməkdaşlıq məsələləri müzakirə olunacaq.
Həmçinin, "İnvestisiyaların artırılması və qarşılıqlı qorunmasına dair" hökumətlərarası saziş layihəsi barədə müzakirələrin aparılması istisna olunmur, çünki sazişlə bağlı hələ də fikir ayrılığı var.
Azərbaycan DGK-nin məlumatına görə, iki ölkə arasında 2011-ci yanvar-iyul aylarında əmtəə dövriyyəsi 1,73 milyard dollar təşkil edib ki, bu göstərici ötən ilin müvafiq dövrü ilə müqayisədə 69,74 faiz artıb.
Rusiya Federal Gömrük Xidmətinin məlumatına əsasən, 2010-cu ildə Rusiya ilə Azərbaycan arasındakı əmtəə dövriyyəsi 1947,9 milyon dollar olub.
