Azərbaycan, Bakı, 12 oktyabr /Trend, müxbir N.İsmayılova/
2012-ci ildə Azərbaycan iqtisadiyyatında ümumi investisiyaların həcmi 13,5 milyard dollar səviyyəsində proznozlaşdırılır ki, bu da 2011-ci ilin yekunu üzrə gözlənilən müvafiq göstəricini 9,7 faiz üstələyir. Trend-in məlumatına görə, Bu barədə çərşənbə axşamı Maliyyə Nazirliyinin rəsmi saytında dərc olunmuş 2012-ci və növbəti üç il üçün Azərbaycanın dövlət və icmal büdcəsi layihəsində deyilir.
2011-ci il üçün gözləntilərə əsasən, ölkə iqtisadiyyatında ümumi investisiyaların həcmi 12,3 milyon manat təşkil edəcək.
Gələn il ümumi investisiya həcmində daxili investisiyanın xüsusi çəkisi 70,3 faiz, xarici investisiyaların isə 29,7 faiz olacağı proqnozlaşdırılır. Cəlb olunan ümumi həcmdən 68,4 faizin qeyri-neft sektoruna yönəldilməsi planlaşdırılır. Gələn il dövlət investisiyalarının həcmi 7,5 milyard manat səviyyəsində proqnozlaşdırılır. Özəl investisiyalar ümumi investisiya həcminin 44,8 faizini təşkil edəcək və xüsusi çəkisi artacaq.
Proqnozlara görə, 2012-ci ildə ixrac 26,6 milyard dollar təşkil edəcək. Ümumi ixracın 92,4 faizi neft-qaz sahəsinin hesabına təmin ediləcək. İdxal isə 9,7 milyard dollar səviyyəsində proqnozlaşdırılır.
Oktyabrın 12-nə olan rəsmi məzənnə 0,7868 AZN/USD təşkil edir.
...
