...

Azərbaycan Belarus avtobuslarının yığılmasına başlamağı planlaşdırır

Biznes və iqtisadiyyat xəbərləri Materials 19 Oktyabr 2011 15:33 (UTC +04:00)

Azərbaycan, Bakı, 19 oktyabr /Trend, müxbir A.Axundov/

Hazırda Gəncə Avtomobil Zavodunda Minsk Avtomobil Zavodunun (MAZ) avtobuslarının yığılması məsələsinə baxılır. Trend-in məlumatına görə, bu barədə çərşənbə günü jurnalistlərə Belarusun Azərbaycandakı səfiri Nikolay Patskeviç bildirib.

"İndi Bakıda avtobuslarla bağlı məsələ həll olunur. Bununla belə, paytaxtda və başqa şəhərlərdə yeni avtobuslara tələbat var", - Patskeviç deyib.

Onun sözlərinə görə, Gəncə Avtomobil Zavodunun inkişaf səviyyəsi bu gün həmin layihə ilə ciddi məşğujl olmağa imkan verir.

"Zavodda avtobusların yığılması zamanı lokallaşdırmanın səviyyəsi traktorların yığımı zamanı olduğundan daha yuxarı ola bilər", - o deyib.

Səfirin sözlərinə görə, MAZ Gəncə Avtomobil Zavodu ilə əməkdaşlığı özünün xaricdəki ən uğurlu layihəsi hesab edir. Azərbaycanda Belarus istehsalı olan yük maşınları və traktorlar yığılır.

"Layihənin gələcəkdə inkişaf edəcəyinə şübhə yoxdur. Azərbaycanın dinamik inkişafı buna zəmanətdir. Yəni ölkəyə Gəncə Avtomobil Zavodunda istehsal olunan texnika lazımdır", - Patskeviç deyib.

Hazırda Gəncə Avtomobil Zavodunda "Belarus" traktorları və MAZ avtomobilləri yığılır. Azərbaycanda Minsk Avtomobil və Traktor zavodlarının istehsalı olan yük avtomobilləri və traktorların yığılması və satışı haqqında saziş 2006-cı il noyabrın sonunda Minskdə imzalanıb. Gəncə zavodu Azərbaycanda ildə 1000-dək yük avtomobili və 2000-dək traktor yığmaq iqtidarındadır.

Xəbər lenti

Xəbər lenti