Azərbaycan, Bakı, 7 dekabr /Trend, müxbir A.Axundov/
Azərbaycan Mərkəzi Bankı (AMB) dünya maliyyə-borc böhranı ilə bağlı vəziyyəti izləyir və ehtiyat tədbirləri görür. Trend-in məlumatına görə, bu barədə çərşənbə günü jurnalistlərə AMB-nin idarə heyətinin sədri Elman Rüstəmov deyib.
"Biz bu tədbirləri 2008-ci il maliyyə-iqtisadi böhranın başlamasından etibarən görürük və strateji valyuta ehtiyatlarının idarə edilməsinin daha güzəştli variantına gəlmişik", - Rüstəmov vurğulayıb.
Onun sözlərinə görə, dünya bazarlarında risk böyükdür, lakin Avropa bazarlarında hamının pulu var və hamı təhlükəsizlik tədbirləri görür.
"Hazırda emosional addımlar atmağın vaxtı deyil. Biz böhrandan daha çox ziyan görən ölkələrə kömək göstərilməsi üzrə qərarın tapılacağı mövzusunda nikbin ruhdayıq və bu, avronun taleyinə də təsir edəcək", - Rüstəmov qeyd edib.