Azərbaycan, Bakı, 27 yanvar /Trend, müxbir A.Axundov/
Yaxın iki il ərzində Bakının ilkin mənzil bazarında təkliflər portfelinin azalması davam edəcək. Bu barədə cümə günü Trend-ə "MBA Group" konsaltinq şirkətinin baş direktoru Nüsrət İbrahimov bildirib.
"2011-ci ildə portfelin azalması qeydə alınıb. Belə ki, çox az sayda binaların tikintisinə başlanmışdı. Bu gün ilkin mənzilin orta hesabla 17-18 faizi satılmayıb, halbuki bir neçə il əvvəl bu göstərici 30 faiz səviyyəsində olub, yəni təklif azalır", - İbrahimov qeyd edib.
Onun sözlərinə görə, 2012-ci ildə ilkin mənzil bazarında təkliflər portfelinin azalması davam edəcək, belə tendensiya 2013-ci ildə də qorunacaq.
"Çox güman ki, təkliflər portfeli 2014-cü ildə sabitləşməyə başlayacaq. Bu, yeni binaların tikintisi hesabına baş verəcək", - İbrahimov deyib.
Onun sözlərinə görə, 2011-ci ilin sonuna qədər ilkin mənzil bazarında 180 çoxotaqlı yaşayış binası, 1425 mənzil təklif edilib.
