Azərbaycan, Bakı, 12 mart /Trend, müxbir A.Axundov/
2011-ci ildə Azərbaycanda adambaşına düşən sığorta mükafatının həcmi 23,4 manat təşkil edib. Trend-in məlumatına görə, bu barədə "Nazirlər Kabinetinin 2011-ci ildə fəaliyyəti haqqında hesabat"da deyilir.
2011-ci ildə ölkədə fəaliyyət göstərən şirkətlərin mükafatlarının ümumi həcmi 212,98 milyon manat (il ərzində 36,89 faiz) təşkil edib, hesabat dövründə 61,57 milyon manat dəyərində (14,38 faiz artım) ödənişlər həyata keçirilib.
2011-ci ildə yığımların 74 faizi könüllü sığortanın, 26 faizi isə icbari sığorta növlərinin payına düşüb.
Azərbaycanda həyat sığortası bazarı ötən illə müqayisədə (1,46 milyon manat) 15,45 dəfə artaraq 2011-ci ildə 22,55 milyon manata çatıb.
"2011-ci ildə beynəlxalq standartlara uyğun sığorta bazarının inkişafı, bazarın peşəkar iştirakçıları arasında sağlam rəqabətin təmin edilməsi, maliyyə sabitliyinin və şirkətlərin ödəmə qabiliyyətinin gücləndirilməsi, sığortaçıların maraqlarının müdafiə mexanizmlərinin artırılması, habelə dövlət sığorta nəzarətinin səmərəliliyinin artırılması sahəsində qanunvericiliyin təkmilləşdirilməsi üzrə işlər davam etdirilib", - hesabatda deyilir.
