Azərbaycan, Bakı, 29 mart /Trend, müxbir Ə.Həsənov/
"Baltika-Bakı" pivə zavodu 2011-ci ilin yekunları üzrə təqribən 3,3 milyon dekalitr pivə istehsal edib. Bu barədə cümə axşamı Trend-ə zavodun baş direktoru Adam Tlexuray bildirib.
"Ötən il Azərbaycanın pivə bazarı 2010-cu ildə olduğu səviyyədə qalıb: adambaşına təqribən 7 litr. Paytaxta xeyli sayda qonaq cəlb etməli olan "Eurovision 2012" mahnı müsabiqəsinin sponsoru olmaqla zavod özü üçün mövsümün uğurlu başlanğıcını təmin etməyi planlaşdırır", - Tlexuray deyib.
Zavodun maliyyə göstəriciləri gözlənildiyindən bir az fərqli olub. Bunun əsas səbəbləri arasında bütün dünyanı bürüyən və 2009-cu ildəki istehlakçı meyillərə təsir edən maliyyə böhranı və pivə üçün əsas xammal olan taxıl, maya ilə bağlı mürəkkəb vəziyyətdir ki, bu da qiymət artımına səbəb olub.
Onun sözlərinə görə, yerli bazarda zavodun payının cüzi azalmasına baxmayaraq, "Baltika-Bakı" hələ də lider mövqeyini qoruyur və onun payı 75 faiz təşkil edir.
"Azərbaycanın pivə bazarı artır və getdikcə daha açıq olur, bazarda oyunçuların sayı artır. Biz sağlam rəqabətin tərəfdarıyıq ki, bu da bizə Bakıda pivə mədəniyyətini inkişaf etdirməyə imkan verir", - Tlexuray qeyd edib.
"Baltika-Bakı" zavodu 2008-ci ildə "Baltika" şirkəti tərəfindən alınıb və ilk xarici istehsalat meydançası və şirkətin tərkibində 12-ci zavod olub.
2008-ci ildə müəssisəyə 20 milyon dollar investisiya qoyulub.
"Bu vəsaitlər zavodun yenidən təchiz edilməsinə ayrılıb. Növbəti illərdə müəssisəyə gələcək inkişaf üçün - həm əlavə avadanlığın alınması, həm də heyətin inkişafı məqsədilə hər il bir neçə milyon manat qoyulub", - zavodun baş direktoru deyib.
Hazırda "Baltika-Bakı" zavodunun maksimum gücü 10 milyon dekalitr təşkil edir, halbuki Azərbaycan bazarının tələbatı 6 milyon dekalitr qiymətləndirilir.