Azərbaycan, Bakı, 18 aprel /Trend, müxbir A.Axundov/
Azərbaycanda nağdsız formada keçirilən sahibkarlıq subyektlərinin dövriyyəsinin vergiqoymadan qismən azad edilməsi mümkündür. Trend-in məlumatına görə, bu barədə Azərbaycan Vergilər Nazirliyinin İqtisadi təhlil və sahibkarlıq subyektlərinin dövlət qeydiyyatı Baş İdarəsinin rəisi Natiq Şirinov çərşənbə günü jurnalistlərə bildirib.
Onun sözlərinə görə, bu məsələ hökumətdə müzakirə edilir və qəbul edilməsi yaxın vaxtlarda gözlənilən Vergi Məcəlləsinə əlavə və dəyişikliklər layihəsində öz əksini tapa bilər.
"Azərbaycanda nağdsız hesablaşmaların stimullaşdırılması üzrə tədbirlər çərçivəsində nağdsız hesablaşmalara böyük diqqət yetirəcək təşkilatlar bəzi vergilərdən azad edilə bilər. Bu azad edilmə ancaq nağdsız formada keçirilən əməliyyatlara şamil ediləcək", - Şirinov deyib.
Hazırda Vergilər Nazirliyi elektron ticarətin vergiqoymaya cəlb edilməsi sahəsində dünya təcrübəsini də öyrənir.
"Biz Avropa Vergi İnzibatçılığı Təşkilatına (IOTA) sorğu göndərmişik və Avropanın qabaqcıl təcrübəsi öyrənildikdən sonra ölkənin vergi qanunvericiliyində bu sahədə həm stimullaşdırıcı, həm də inzibati tədbirlər nəzərdən keçiriləcək", - o qeyd edib.
Şirinovun sözlərinə görə, Vergilər Nazirliyi ötən həftənin cümə axşamından internet vasitəsilə vergi və dövlət rüsumlarının ödənişi üzrə xidməti işə salıb. Xidmətdən Azərbaycan Mərkəzi Bankının saytında istifadə etmək mümkündür. İnternet şəbəkəsi vasitəsilə vergi və dövlət rüsumlarının bütün növlərini ödəmək mümkün olacaq.