Azərbaycan, Bakı, 18 aprel /Trend, müxbir A.Axundov/
Azərbaycan şirkətlərinin ötən il dekabrın 16-dan tətbiqinə başladıqları "İcbari sığortalar haqqında" qanun özünü tamamilə doğruldur. Bu barədə çərşənbə günü Trend-ə maliyyə nazirinin müavini Azər Bayramov məlumat verib.
"Biz sığorta bazarının ciddi fəallaşmasını və onun, xüsusilə bu qanunla tənzimlənən sığorta növlərinin həcminin çox ciddi artımını müşahidə edirik", - Bayramov deyib.
İcbari Sığorta Bürosuna daxil olan və sığortanın həmin növləri ilə məşğul olmaq hüququna malik şirkətlər yanvar-mart aylarında avtoqnəqliyyat vasitəsi sahiblərinin mülki məsuliyyətinin icbari sığortası üzrə 10,95 milyon manat toplayıblar ki, bu da ötən ilin analoji dövr göstəricisindən 12 dəfə çoxdur. Ümumilikdə, bu ilin yanvar-mart aylarında icbari sığorta növləri üzrə mükafatların 51,9 faizi və bu dövrdə bazarda toplanan bütün mükafatların 13,4 faizi avtoqnəqliyyat vasitəsi sahiblərinin mülki məsuliyyətinin icbari sığortasının payına düşür.
"Hələ ilin əvvəlidir, lakin artıq bazarda çox ciddi artım görürük. Hesab edirəm ki, ilin yekunları üzrə bazarın artımı ötənilkindən daha yüksək olacaq. Birinci rüb göstərir ki, bu vəziyyət kifayət qədər nikbindir", - nazir müavini deyib.
2011-ci ildə Azərbaycanın sığorta bazarında artım 36,89 faiz olub, yığımların ümumi həcmi 212,98 milyon manat təşkil edib.