Azərbaycan, Bakı, 10 may /Trend, müxbir A.Axundov/
Azərbaycan Beynəlxalq Bankının (ABB) səhmdarları nizamnamə kapitalının artırılmasında iştirakdan imtina edəcəyi təqdirdə, bankın səhmləri yeni emissiya çərçivəsində fond bazarında satışa çıxarıla bilər. Bu barədə cümə axşamı Trend-ə ABB-nin İdarə Heyətinin sədri Cahangir Hacıyev bildirib.
Bir müddət əvvəl səhmdarların yığıncağı bankın kapitalının 100 milyon manat artırılması haqqında qərar qəbul etmişdi. Hazırda ABB-nin nizamnamə kapitalı 240 milyon manat təşkil edir.
"Biz nizamnamə kapitalını 100 milyon manat artırdıq. Maliyyə Nazirliyi bankın nizamnamə kapitalında iştirakda dövlət payının (50,2 faiz) ödənişi üçün 50 milyon manatı artıq ödəyib. Qalan 50 faizi, qanuna uyğun olaraq, digər səhmdarlarımıza (onlara 49,8 faiz məxsusdur) artıq təklif etmişik. Əgər səhmdarlar öz payını ödəməkdən imtina edərlərsə, o zaman müvafiq olaraq səhmlər bazara çıxarılacaq", - Hacıyev deyib.
Qanunvericiliyə əsasən, səhmlərin emissiya prospektinin yerləşdirilməsi il ərzində həyata keçirilə bilər.