Azərbaycan, Bakı, 24 may /Trend/
Azərbaycanda səfərdə olan Birləşmiş Ərəb Əmirliklərinin iqtisadiyyat nazirinin müavini Məhəmməd Bin Abdul Aziz Al Şehhinin rəhbərlik etdiyi nümayəndə heyəti cümə axşamı iqtisadi inkişaf naziri Şahin Mustafayevlə görüşüb. Görüşdə mövcud iqtisadi əlaqələr və qarşılıqlı investisiya imkanları müzakirə edilib.
İqtisadi İnkişaf Nazirliyinin mətbuat xidmətindən Trend-ə verilən məlumata görə, ölkəsində Azərbaycanla əməkdaşlığa xüsusi önəm verildiyini vurğulayan Al Şehhi Azərbaycanda Dubay Ticarət və Sənaye Palatasının Nümayəndəliyinin yaradılacağını və bu Nümayəndəliyin MDB ölkələri ilə əməkdaşlıq üzrə baş ofis funksiyasını həyata keçirəcəyini bildirib. Dubay Ticarət və Sənaye Palatası BƏƏ-nin Ticarət və Sənaye Palataları Federasiyasına daxil olan ən böyük ticarət palatasıdır.
Dubay Ticarət və Sənaye Palatasının baş direktoru Hamad Buamin təmsil etdiyi qurum barədə məlumat verərək, 133 min üzvü olan Palatanın dünyanın 100-dən artıq ölkəsində fəaliyyət göstərdiyini qeyd edib. Buamin Dubay Ticarət və Sənaye Palatasının Nümayəndəliyinin Azərbaycanda yaradılmasında əsas səbəb kimi ölkələrimiz arasında yüksək səviyyəli münasibətlərin formalaşması, eləcə də Azərbaycanda siyasi və makroiqtisadi sabitlik, davamlı iqtisadi inkişaf, əlverişli biznes və investisiya mühiti olduğunu diqqətə çatdırıb. O, regionun lider dövləti olan Azərbaycanın Körfəz ölkələri ilə MDB arasında körpü rolunu oynayacağına əminliyini vurğulayıb.
İqtisadi inkişaf naziri Şahin Mustafayev ölkəmizin dünyada nüfuzunun artdığını, etibarlı tərəfdaş kimi tanındığını, ölkəmizdə möhkəm siyasi və makroiqtisadi sabitliyin, davamlı və dayanıqlı iqtisadi inkişafın təmin olunduğunu, əlverişli biznes və investisiya mühitinin yaradıldığını vurğulayıb. Mustafayev Dubay Ticarət və Sənaye Palatasının Azərbaycanda Nümayəndəliyinin yaradılmasının ikitərəfli iqtisadi əməkdaşlığın inkişafı və ticarət dövriyyəsinin artırılması istiqamətində imkanları daha da genişləndirəcəyini qeyd edib.
Azərbaycana səfəri çərçivəsində Birləşmiş Ərəb Əmirliklərinin iqtisadiyyat nazirinin müavini Məhəmməd Bin Abdul Aziz Al Şehhinin başçılıq etdiyi nümayəndə heyəti ilə bir sıra dövlət qurumlarında görüşlər keçirəcək.
Azərbaycanda İxracın və İnvestisiyaların Təşviqi Fondunun (AZPROMO) və Azərbaycan İnvestisiya Şirkətinin nümayəndələri ilə keçirilmiş görüşdə ölkəmizin investisiya imkanları təqdim edilib.