"AtaBank" 2013-cü ildə kapitalı yeni normativədək artıracaq
Azərbaycan, Bakı, 2 oktyabr /Trend, müxbir A.Axundov/
"AtaBank" ölkədə bankların kapitalına qarşı sürülən yeni tələblərə uyğunlaşmaq üçün lazımi tədbirlər görəcək. Bu barədə Trend-ə çərşənbə axşamı bankın üzvü olduğu "AtaHolding" şirkətlər qrupunun İdarə Heyətinin sədri Fərid Əsədov bildirib.
Azərbaycan Mərkəzi Bankının İdarə Heyətinin 25 iyul 2012-ci il tarixli qərarı ilə fəaliyyətdə olan bankların məcmu kapitalı, habelə yenidən yaradılan bankların nizamnamə kapitalının minimum həcmi 10 milyondan 50 milyon manatadək artırılıb. Fəaliyyətdə olan banklar üçün bu qərar 2014-cü il yanvarın 1-dən qüvvəyə minir.
2012-ci ilin ilk yarımilliyinin sonuna olan məlumata görə, "AtaBank"ın nizamnamə və məcmu kapitalı müvafiq olaraq, 25 milyon manat və 32,6 milyon manat təşkil edib.
"Bank gələn il 20 illiyini qeyd edəcək. "AtaBank" özünə ad qazanan banklardan biridir və Azərbaycanda yaxşı etibarı var. Biz bundan sonra da inkişaf edəcəyik. Hazırda biz kapitalın artırılması üzərində işləyirik", - Əsədov qeyd edib.
Onun sözlərinə görə, çox güman ki, kapitallaşma prosesi gələn ildən başlayacaq.
"Hələlik bu məsələ üzrə səhmdarların qərarı yoxdur, proses bu qərarın qəbulundan sonra başlayacaq", - Əsədov vurğulayıb.
