Azərbaycan, Bakı, 26 noyabr / Trend, müxbir A.Axundov/
Milli Məclisdə müzakirə edilən qiymətləndirmə fəaliyyəti haqqında qanun layihəsində yaradılması nəzərdə tutulan Azərbaycan Qiymətləndiricilər Palatası ölkədə qiymətləndirmə reyestrini aparmalı və zərurət olduqda bu reyestrdən əlaqədar şəxslərə informasiya verməlidir. Trend-in məlumatına görə, bu barədə qanun layihəsinin mətnində deyilir.
Qanun layihəsi qiymətləndirmə fəaliyyətinin tənzimlənməsi və idarə olunması, vahid qiymətləndirmə təcrübəsinin formalaşması və qiymətləndirmə xidmətlərinin əlaqələndirilməsi məqsədi ilə qiymətləndiricilər tərəfindən təsis edilən müstəqil idarəetmə təşkilatı kimi Azərbaycan Qiymətləndiricilər Palatasını müəyyən edir.
Qiymətləndiricilər Palatası hüquqi şəxsdir, onun fəaliyyəti bu qanunla, eləcə də bu qanun çərçivəsində qəbul edilməsi planlaşdırılan nizamnamə ilə tənzimlənir.
Qiymət qoyanlar palatası funksiyalarına qiymətləndirmə fəaliyyəti sahəsində dövlət siyasətinin həyata keçirilməsi, qiymətləndirmə fəaliyyətinin hüquqi və iqtisadi tənzimlənməsinin təkmilləşdirilməsi, qiymətləndirmə fəaliyyətini nizama salan normativ-hüquqi aktların layihələri üzrə təkliflərin formalaşdırılması daxildir.
Palata, həmçinin qiymət standartlarını, qiymətləndiricilərin işçi və peşə etikası qaydalarını hazırlamalı və qəbul etməli, qiymətləndiricilərin hüquqlarını və qanuni maraqlarını müdafiə etməlidir.
İdarə Heyəti ilə yanaşı, təşkilatın Ümumi Yığıncağı Palatanın idarəetmə orqanıdır və ildə bir dəfədən gec olmayaraq çağırılmalıdır. İdarə Heyətinin sədri, onun müavini və İdarə Heyətinin başqa üzvləri (onların sayı ən azı yeddi nəfər olmalıdır) beş ildə bir dəfə Ümumi Yığıncaqda seçilirlər.
Qiymətləndirmə fəaliyyəti üzərində nəzarət Palatanın struktur bölmələri vasitəsi ilə plan və plandankənar yoxlamalar şəklində həyata keçiriləcək. Plan yoxlaması üç ildə bir dəfədən az və ildə bir dəfədən çox olmamaqla aparılmalı, yoxlama dövrü bir ayı ötməməlidir.
Palata yanında Ekspert Şurası yaradılacaq. Onun tərkibi ən azı yeddi nəfərdən ibarət olmalıdır. Ekspert Şurası şuranın qiymətləndirmə hesabatlarının qanunvericiliyə uyğunluğu ekspertizasını həyata keçirəcək, həmçinin qiymətli kağızların qiymətləndirilməsi haqqında hesabatlar hazırlayacaq. Qanun layihəsinə əsasən, Azərbaycan Qiymətləndiricilər Palatasının Təsis Yığıncağı bu qanunun qüvvəyə mindiyi gündən üç ay sonra keçirilməlidir.
Azərbaycanın Qiymətləndiricilər Palatası haqqında qanun layihəsi ötən cümə günü Milli Məclisin İqtisadi siyasət komitəsinin iclasında müzakirə olunub və birinci oxunuşda plenar iclasın müzakirəsinə tövsiyə edilib.