Azərbaycan, Bakı, 7 dekabr /Trend, müxbir E.İsmayılov/
Digər ölkələrin Bakı-Tbilisi-Qars dəmir yolu layihəsinə qoşulması tariflərin tənzimlənməsinə və yükdaşımalarının artmasına səbəb olacaq. Trend-in məlumatına görə, bu barədə cümə günü jurnalistlərə "Azərbaycan Dəmir Yolları" QSC-nin sədr müavini Qurban Nəzirov deyib.
"Qazaxıstan bu layihədə iştirak etmək niyyəti ilə artıq rəsmən müraciət edib. Digər ölkələrin bu layihəyə qoşulması xüsusi şərtlərin və güzəştli tariflərin tətbiqi anlamına gəlir", - Nəzirov qeyd edib.
Yeni dəmir yolu əlaqəsi Gürcüstan ərazisindən keçməklə Avropaya yüklərin daşınmasını təmin edəcək.
Nəzirov deyib ki, Bakı-Tbilisi-Qars dəmiryolu xətti layihəsinin 2014-cü ildə tam istismara verilməsi planlaşdırılır.
"Bu il yükdaşımalarda müsbət tendensiya müşahidə edilir. Xüsusilə 11 ay ərzində 21,2 milyon ton yük daşınıb. Ötən illə müqayisədə plan 104 faiz yerinə yetirilib", - Nəzirov vurğulayıb.
Onun sözlərinə görə, proqnozlara əsasən, gələn il yükdaşımaların təqribən 20-30 faiz artması gözlənilir.